धनगढी । आज ‘क्रिसमस डे’ नेपालसहित विश्वभरका क्रिश्चियन धर्मावलम्बीहरुले उल्लासका साथ यो पर्व मनाउँदैछन् । अंग्रेजी क्यालेन्डर अनुसार हरेक वर्ष २५ डिसेम्बरमा येशु ख्रिष्टको जन्मदिनको खुशियाली मनाउने परम्पराअनुसार क्रिश्चियन धर्मालम्बीले आज क्रिसमस मनाउन लागेका हुन् ।दुई हजार वर्षअघि जेरुसेलमको बेथलेहममा कन्या मारियमको कोखबाट येशुको जन्म भएको मानिन्छ । येशुलाई जिसस क्राइस्ट पनि भनिन्छ । उनले मानव समुदायका लागि पु¥याएको योगदानको सम्झनामा इस्वी संवत् चलाइएको विश्वास गरिन्छ । सुदूरपश्चिम प्रदेशमा १.४ प्रतिशत क्रिश्चियन जनसंख्या रहेको पाइएको छ ।  राष्ट्रिय जनगणना २०७८ अनुसार २६ लाख ९४ लाख ७८३ जनसंख्या रहेको सुदूरपश्चिममा ३७ हजार ५४० क्रिश्चियन धर्म मनाउने रहेका छन् । प्रदेशमा ९७.४ प्रतिशत हिन्दु, ०.८ प्रतिशत बौद्ध, ०.३ प्रतिशत इस्लाम, ०.०१ प्रतिशत किरात, ०.१ प्रतिशत प्रकृति, ०.०१ बोन र बहाइ धर्मावलम्बी रहेका छन् ।यस्तै नेपालमा ८१ प्रतिशतभन्दा बढी मानिसले हिन्दु धर्म मान्ने गरेको पाइएको छ । राष्ट्रिय जनगणना २०७८ को जाति र धर्म सम्बन्धी सार्वजनिक भएको तथ्यांक  अनुसार नेपालमा १० वटा धर्म मान्ने मानिसहरुको बसोबास छ ।जनगणनाअनुसार नेपालको कुल जनसंख्या २ करोड ९१ लाख ६४ हजार ५७८ पुगेको छ । उनीहरुमध्ये सबभन्दा धेरै २ करोड ३६ लाख ७७ हजार ७४४ जना अर्थात् ८१.१९ प्रतिशतले आफ्नो धर्म हिन्दु भएको बताएका छन् ।यस्तै २३ लाख ९३ हजार ५४९ जना अर्थात् ८.२१ प्रतिशतले बौद्ध धर्म मान्ने गरेका छन् । ५.०९ प्रतिशतले इस्लाम, ३.१७ प्रतिशतले किराँत र १.७६ प्रतिशतले क्रिश्चियन धर्म मान्ने गरेको पाइएको छ ।