काठमाडौं । शिक्षक तथा विद्यालय कर्मचारीको आन्दोलनका कारण माध्यमिक शिक्षा परीक्षा (एसईई) को उत्तरपुस्तिका परीक्षण प्रभावित भएको छ, जसले गर्दा नतिजा समयमै सार्वजनिक हुने सम्भावना घटेको छ। राष्ट्रिय परीक्षा बोर्डले असारको पहिलो सातासम्म नतिजा प्रकाशन गर्ने योजना बनाए पनि उत्तरपुस्तिका परीक्षणमा भएको ढिलाइका कारण सो समयसीमा नाघ्ने निश्चितप्राय भएको छ।परीक्षा नियन्त्रक गणेश भट्टराईका अनुसार उत्तरपुस्तिका परीक्षण केन्द्रमा पुगिसके पनि शिक्षकहरूले कपी जाँच्न नआएपछि प्रक्रिया अघि बढ्न सकेको छैन। ‘शिक्षकहरू बिना उत्तरपुस्तिका परीक्षण सम्भव छैन,’ भट्टराईले बताएका छन्।गत ७ चैतदेखि सञ्चालन भएको एसईई परीक्षामा करिब ५ लाख विद्यार्थी सहभागी भएका थिए। तर २० चैतदेखि शिक्षक महासंघको आन्दोलनले शैक्षिक गतिविधि ठप्प बनाएको छ। महासंघले शिक्षक–कर्मचारी मैत्री विद्यालय शिक्षा ऐन जारी गर्न माग गर्दै आन्दोलन चर्काइरहेको छ।सरकारले आन्दोलन फिर्ता गर्न आग्रह गर्दै शिक्षकका माग सम्बोधनका लागि संसद अधिवेशन बोलाउने तयारी गरेको भए पनि महासंघले ऐन जारीको स्पष्ट ग्यारेन्टी नभएसम्म आन्दोलन नरोकिने स्पष्ट पारेको छ। महासंघकी सहअध्यक्ष नानुमाया पराजुलीले सरकारका आश्वासनमा विश्वास गर्न सकिने आधार नरहेको बताइन्।यदि आन्दोलन तत्काल अन्त्य भएन भने एसईई नतिजासँगै कक्षा १२ को परीक्षा पनि प्रभावित हुने निश्चित देखिएको छ। महासंघले आन्दोलनलाई अझ व्यापक बनाउने तयारी गरेको छ, जसले सम्पूर्ण शैक्षिक प्रणालीमा गम्भीर असर पार्ने संकेत गरेको छ।