धनगढी ।मोहना नदि किनाराका जनताले बषौं पहिलेदेखि वडा अध्यक्ष देखि सांसदसम्मलाई माग्ने एउटै माग हो नदिमा तटबन्धन । तर नदिमा तटबन्धन नहुदाँ हरेक बर्ष नदि कटान तिब्ररुपमा बढ्दै गइरहेको छ । कैलालीको धनगढी उपमहानगरपालिका फूलवारी क्षेत्रमा मोहना नदिको कटानले सार्वजनिक सम्पत्ति सँगै कयौं बस्तीहरु जोखिममा परेका छन् । तर चुनाबका लागि भोट संरक्षण गर्न हदैसम्मको मिहनेत गर्ने नेताहरुले भोटदिने जनता र ती बस्तीको संरक्षणमा बेवास्था गरेको नदिकटान क्षेत्रका बासिन्दाले गुनासो गरेका छन् । केही बर्षदेखि मोहना नदिले तिब्ररुपमा कटान गर्दा करिब ३० बिघा क्षेत्रफमा रहेको धनगढी १९ ललीतपुर स्थित सुन्दर शक्ति सामुदायिक वनको आधाभन्दा बढि भाग नदिमा परिणत भईसकेको छ ।सो क्षेत्रमा एक दुई बर्षभित्र तटबन्धन नगरिएमा बाँकि रहेको सामुदायिक वन र वनसँगै जोडिएको ललीतपुर ससस्त्र प्रहरी क्याम्प,विद्यालय र क्लवको जमिन नदिमा परिणत हुने स्थानीयहरुको भनाई छ ।हालसम्म सो क्षेत्रमा स्थायी तटबन्धनको लागि कुनै योजना नपरेको बताउंदै स्थानीय रामप्रसाद चौधरीले नेपालु चौधरी प्रदेश सांसद हुदाँ २० लाखको अस्थायी तटबन्धन निर्माण गरिएको जानकारी दिए । तर बाँसको प्रयोग गरी गरिएको सो तटबन्धन एक बर्ष नपुग्दै नदिले बगाएको उनले बताए । ललीतपुर क्षेत्रको मोहना नदिमा तटबन्धन नहुदाँ ससस्त्र प्रहरी क्याम्पको भवन सहित १ बिघा, सुर्मादेवी युवा क्लवको ४ विघा,जनप्रिय आधारभुत विद्यालयको ५ बिघा,सुन्दरशक्ति सामुदायिक बनको बाँकि रहेको करिब १० बिघा सार्वजनिक सम्पत्ति र सयौं बिघा स्थानीय जनताको जमिन सहित ललीतपुर बस्ती नै नदि कटानको उच्च जोखिममा रहेको धनगढी १९ का वडा सदस्य हरेन्द्र ऐडीले बताए । त्यस्तै मोहना नदिले धनगढी १९ साझघारी स्थित भाकल सामुदायिक वनको करिब १० बिघा जमिन कटान गरेको स्थानीय रबिन चौधरीले बताए । उनले नदि कटानको कारण सो क्षेत्रका १८ परिवार विस्थापीत भएको र स्थानीयको सयौं बिघा जमिन कटान गरी नदिमा परिणत भएको बताए । साझघारीको भाकल सामुदायिक वन क्षेत्रमा पर्ने मोहना नदिमा हालसम्म तटबन्धन नहुदाँ उक्त सामुदायिक वन,स्थानीयको जमिन सहित बस्ती नै नदि कटानको उच्च जोखिममा रहेको चौधरीले बताए । त्यसैगरी धनगढी १८ स्थित नुकलीपुर बस्ती पनि मोहना नदिको चपेटामा परेको छ । हरेक बर्ष बाढी आउँदा नुुकलीपुर बस्तीका बासिन्दालाई उद्धार गरि सुुरक्षित ठाउँमा राखिने गरिएको अध्यक्ष भुवन रिजालले बताए । १३० परिवारको बसोबास रहेको नुुकलिपुुर बस्ती मोहना नदि कटानको उच्च जोखिमा रहेको  छ। नदिले हरेक बर्ष कटान गर्दै आईरहेको बताउँदै अध्यक्ष रिजालले नदिमा तटबन्धनका लागि उपमहानगरपालिका,प्रदेश सरकार , संघिय सरकार तथा जनताको तटबन्धन कार्यक्रमलाई आग्रह गर्दा कसैले चासो नदिएको बताए । अध्यक्ष रिजालले वडाको बजेटले तटबन्धन गर्न नसकिने भएकाले माथिल्लो निकायलाई सिफारिस गरि पठाउँदा कतैबाट पनि बजेट नपरेकोमा दुख व्यक्त गरे ।नुकलीपुर बस्तीको समस्याको बारेमा नगरप्रमुख ,प्रदेश तथा संघका माननीयलाई जानकारी हुदाँ समेत तटबन्धनको लागि पहल नगरेको भन्दै स्थानीय जनताले गुनासो गरेका छन् । चुनाबका बेला मात्र जनताको समस्या देख्ने तर जितिसकेपछि बिर्सिने नेताहरुको बानीले गर्दा नुकलीपुर बासीले बषौं पहिलेदेखि दुख भोगीरहेको स्थानीयहरुको भनाई छ । धनगढी १४ स्थित हरिया कटान खुटिया बस्ती खुटिया नदिको मारमा परेको छ । ३० परिवारको बसोबास रहेको सो बस्तीमा बाढी पस्ने गरेको छ । बस्ती सँगै प्राथमिक विद्यालय पनि जोखिममा रहेको धनगढी १४ का महेश गोलेले बताए । प्रदेश सरकारले सो क्षेत्रमा तटबन्धनका लागि १०/१५ लाखका साना टुक्रे योजना हालेको गोलेले बताए । तर साना टुक्रे योजनाले समस्या समाधान नहुने भन्दै ठुलो बजेट आवश्यक रहेको उनको भनाई छ । नदिले तिब्र कटान गरिरहेकाले एकदुई बर्षभित्र तटबन्धन नगरेमा पुरै बस्ती सहित विद्यालय नदिले बगाउन सक्ने भन्दै गोलेले समयमै ध्यान दिन सरोकारवाला निकायलाई आग्रह गरे ।कैलालीका विभिन्न नदिमा तटबन्धन नहुदाँ नदिले हरेक बर्ष जमिन कटान गरिरहेको भएपनि सरोकारवाला निकायले चासो नदिएको  नदि प्रभावित क्षेत्रका जनताहरुको गुनासो छ । सुदुरपश्चिम प्रदेश सरकारका उद्योग, पर्यटन,वन तथा वातावरण मन्त्री तथा कैलाली क्षेत्र नम्बर ५ (क) का सांसद रमेश सिंह धामीले प्रदेशको भौतिक मन्त्रालयबाट कैलालीका विभिन्न नदिमा आवश्यकताका आधारमा तटबन्धन गर्न डल्लो बजेट छुट्याईएको बताए । उनले भने,प्रदेश सरकारले यस बर्ष बजेटमा तटबन्धनका लागि यो वा त्यो ठाउँ नभनी डल्लो बजेट राखेको छ, बर्खा सकिएपछि आवश्यकताका आधारमा बढि समस्या भएको ठाउँ तटबन्धनका लागि बजेट हाल्छौ ।