धनगढी । कैलालीको कैलारी गाउँपालिका, लोहारपुरमा आगामी बैशाख दोस्रो सातादेखि थारु सांस्कृतिक चौथो वड्का भजहर कप सञ्चालन हुने भएको छ । वड्का भजहर कपमा फटवल तथा थारु समुदायका परम्परागत खेल समावेश हुने जनाइएको छ ।युवा जनहित क्लवको अयोजनामा हुने खेलकुद प्रतियोगिता बैशाख १५ देखि २२ गतेसम्म सञ्चालन हुने शुक्रबार क्लवद्वारा धनगढीमा आयोजित पत्रकार सम्मेलनमा जानकारी दिइयो ।क्लवका अध्यक्ष मनिराम चौधरीले चौथो वड्का भजहर कपमा फुटवलका साथै थारु समुदायका महिलाको छुर, डेल्वा दौड र टाँरा छिरउवा तथा पुरुष डेगा दौड, रस्सी तानातान खेल समावेश गरिएको बताए ।आयोजक क्लवका अनुसार फुटवल प्रतियोगिताको विजेताले एक लाख र उपविजेताले ५० हजार रुपैयाँ पुरस्कार पाउने छन् । त्यस्तै, थारु परम्पागत खेलका विजेता टिमले ५० हजार र उपविजेताले २५ हजार रुपैयाँ पुरस्कार पाउने छन् । अध्यक्ष मनिरामले भने– प्रतियोगिताको प्लेयर अफ द टुर्नामेन्टलाई साइकल उपहार प्रदान गरिने छ । त्यस्तै, प्रत्येक खेलको प्लेयर अफ द म्याचलाई समेत पुरस्कार प्रदान गरिने छ ।सो प्रतियोगिताको फुटवल खेलमा १६ वटा टिम सहभागी हुने छन् भने थारु परम्परागत खेलमा ६ टिमको सहभागिता रहने छ ।प्रतियोगितामा सहभागी हुने फुटवल टिमले प्रवेश शुल्कवापत ५ हजार रुपैयाँ तिर्नुपर्ने छ । अध्यक्ष मनिरामले थारु समुदायका परम्परागत खेलमा सहभागीहरूलाई भने निःशुल्क प्रवेशको व्यवस्था मिलाइएको बताए ।प्रतियोगिता सञ्चालनमा ८ देखि १० लाख रुपैयाँ खर्च हुने अनुमान गरिएको छ । प्रतियोगिताको मुख्य प्रवर्धक सुदूरपश्चिम प्रदेश खेलकुद परिषद् रहेको छ र भने कैलारी गाउँपालिका प्रवर्धकका रुपमा रहेको छ ।