कोहलपुर । कोहलपुरमा सम्पन्न नेत्रहीन क्रिकेट प्रतियोगिताको उपाधि कञ्चनपुरले जितेको छ । नेत्रहीन क्रिकेट संघ नेपालले बाँकेको कोहलपुरमा आयोजना गरेको प्रतियोगिताको उपाधि कञ्चनपुरले जितेको हो । मंगलबार खेलिएको फाइनल खेलमा बर्दियालाई ८० रनको फराकिलो अन्तरले हराउँदै कञ्चनपुरले उपाधि हात पारेको हो । पहिले ब्याटिङ गरेको दृष्टिविहीन क्रिकेट संघ कञ्चनपुरले निर्धारित ओभरमा तीन विकेट गुमाएर दुई सय १७ रन बनाएको थियो ।जवाफी ब्याटिङमा ओर्लिएको बर्दिया नेत्रहीन क्रिकेट संघले भने २० ओभरमा चार विकेट गुमाएर एक सय ३७ रनमात्र बनाउन सक्यो । कञ्चनपुरका लागि दुर्गादत्त पौडेलले एक सय ६ रन बनाएका थिए ।सोही योगदानका कारण उनी प्लेयर अफ दी म्याच पनि घोषित भए । पदमबहादुर बडैला प्लेयर अफ दी सिरिज घोषित भए । उनले प्रतियोगिता अवधिभरमा कुल तीन सय १२ रन बनाए ।उनले चार विकेट पनि लिएका थिए । कोहलपुर नगरपालिका कार्यवाहक प्रमुख लालबहादुर रानाले विजेता र उपविजेता टोलीका खेलाडीलाई पुरस्कार तथा प्रमाणपत्र वितरण गरे ।उनले नगरपालिको आगामी बजेटमा फरक क्षमता भएका खेलाडीहरुका लागि बजेट विनियोजन गर्ने प्रतिबद्धता पनि व्यक्त गरे ।