वीरगन्ज । नेपाल पत्रकार महासंघ पर्साले जिल्ला प्रहरी कार्यालय पर्सा अगाडि मंगलबार बेलुकी हिन्दुवादीले गरेको प्रदर्शनको समाचार संकलन गर्ने क्रममा आक्रमण गरि पत्रकारहरूलाई घाइते बनाउने दोषीहरूलाई कारबाहीको माग गरेको छ।मंगलबार बेलुकी जिल्ला प्रहरी कार्यालय अगाडि हिन्दुवादीले गरेको प्रदर्शनको समाचार संकलन गरिरहेका पत्रकार एभीन्युज टिभीका अर्जुन गुप्ता, मध्य नेपाल सन्देशका अनिल ओझा र चन्द्रसूर्य वाणीका धिरेन्द्र तिवारी आक्रमणमा परी घाइते भएका छन्। गुप्ताको टाउको फुटेको छ भने ओझा र तिवारीको खुट्टामा गम्भीर चोट लागेको छ।पत्रकार महासंघ पर्सा शाखाले मंगलबार राति एक विज्ञप्ति जारी गरेर पत्रकारहरु घाइते भएको घटनाप्रति गम्भीर ध्यानाकर्षण भएको जनाएको छ। समाचार संकलनकै क्रममा पत्रकारहरूमाथि भएको आक्रमणका दोषीहरुको पहिचान गरेर कानुनी कारबाहीको दायरामा ल्यान पत्रकार महासंघ पर्सा शाखाले माग गरेको छ।साथै प्रदर्शनको समाचार सामग्री संकलन गरिरहेका सञ्चारकर्मी ढुङ्गा र प्रहरीको लाठीचार्जको निशानामा पर्नु  अत्यन्तै दुःखद र खेदजनक भएको पत्रकार महासंघले जनाएको छ ।आम नागरिक र पत्रकारको सुरक्षाको जिम्मेवारी लिएको प्रहरी प्रशासनले समाचार संकलनमा खटिएका सञ्चारकर्मीलाई सुरक्षित र भयरहित तरिकाले समाचार संकलन र सम्प्रेषण   गर्ने वातावरणको ग्यारेन्टी गर्नुपर्ने पनि पत्रकार महासंघ पर्साले माग गरेको छ।