भैरहवा । सहकारी ठगी र संगठित अपराधमा संलग्न भएको आरोपमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई रुपन्देही ल्याइएको छ । शुक्रबार साँझ काठमाडौँमा पक्राउ परेका रविलाई शनिबार बिहान हवाई मार्ग हुँदै रुपन्देही ल्याइएको हो । शनिबार र आइतबार सार्बजनिक बिदा भएकाले उनलाई सोमबारसम्म जिल्ला प्रहरी कार्यालय रुपन्देहीको हिरासतमा राखिने छ । प्रहरी उपरीक्षक रञ्जितसिंह राठौरले सञ्चारकर्मीलाई दिएको जानकारी अनुसार शनिबार र आइतबार सार्वजनिक बिदा भएकोले सोमबारसम्म प्रहरी हिरासतमा रहने भएका हुन् । ‘दुइ दिन सार्बजनिक बिदा भएकाले सोमबारसम्म उहाँ प्रहरी हिरासतमा रहनु हुन्छ, बिदा खुल्ने बितिक्कै पहिला अदालत पेस गरेर मात्रै अनि कारागार पठाउने छौँ’ उनले भने ।सहकारीको रकम अपचलनकै कसूरमा यसअघि पक्राउ गरेर पुर्पक्षमा कारागारमै रहेका सुप्रिम सहकारीका अध्यक्ष ओम गुरूङलाई भैरहवा जिल्ला कारागारको बल्क नं १ मा राखिएको छ भने छविलाल जोशीलाई ब्लक नं २ मा राखिएको छ । सोमबारदेखि रवि र छविलाई एउटै ब्लकमा राख्ने गरी तयारी भइरहेको कारागार स्रोतले जनाएको छ ।उच्च अदालत तुलसीपुर, बुटवल इजलासले रविलाई पक्राउ गर्ने आदेश दिएको थियो । बुटवलले पुनः पक्राउ गर्न आदेश दिए लगत्तै शुक्रबार साँझ पक्राउ परेका लामिछानेलाई रूपेन्देही हिरासतमा राख्नका लागि बिहानै त्रिभुवन अन्तराष्ट्रिय बिमानस्थल लगिएको थियो । उनलाई पहिलो फ्लाइटबाटै रूपन्देही लगिएको हो ।शुक्रबार रातभर जिल्ला प्रहरी परिसर, भद्रकाली काठमाडौँको हिरासतमा रहेका लामिछानेलाई शनिबार बिहानै विमानस्थल लगिएको हो ।  लामिछानेलाई काठमाडौँको बूढानीलकण्ठस्थित हेपाली हाइटबाट नियन्त्रणमा लिइएको थियो । उच्च अदालत तुलसीपुर, बुटबल इजलासका न्यायाधीशहरु रमेश ढकाल र स्वीकृति पराजुलीको इजलाशमा सुनुवाई सकिएपछि पुनः पक्राउको आदेश दिइएको थियो ।रविले गत सोमबार चैत १८ गते सभापतिको जिम्मेवारी लिएका थिए । जिम्मेवारी लिए लगत्तै उनले शीर्ष दलका नेताहरुलाई गाली गर्न थालेका थिए । उनले नेताहरुका फाइल खोल्ने धम्की दिँदै आफू नितान्त चोखो रहेको प्रमाण पेश गर्दै नेता कार्यकर्तालाई उरालेका थिए । उनले अहिलेको तन्त्रप्रतिसमेत असन्तुष्टि राखेका थिए । अहिलेको तन्त्रबाटै पार्टी गठन गरेर ०७९ को संसदीय निर्वाँचनमा भाग लिएर चौथो ठूलो दल भएको बिर्सेर रविले एकाएक शीर्ष दलहरुप्रति आक्रोश पोख्दै उनीहरुसँग बसेर फोटो खिच्ने रहर नभएको बताएका थिए । यसपालि रुपन्देहीको सुप्रिम सहकारी ठगी तथा संगठित अपराधमा उनलाई थुनामा पठाउने आदेश भएसँगै प्रहरीले शुक्रबार साँझै प्रक्राउ गरेको हो । उच्च अदालत तुलसीपुर, बुटवल इजलासका न्यायाधीश रमेश ढकाल र स्वीकृति पराजुलीको संयुक्त इजलासले रविलाई थुनामा पठाउने आदेश गरेको थियो ।उक्त मुद्दामा रुपन्देही जिल्ला अदालतले एक करोड धरौटीमा रिहा हुने आदेश गरेको थियो । उच्च अदालतले उक्त मुद्दा बदर गर्दै रविलाई पुर्पक्षका लागि थुनामा राखेर अनुसन्धान अघि बढाउन आदेश दिएको हो ।जिल्ला अदालतका न्यायाधीश प्रल्हादकुमार योगीको इजलासले लामिछानेलाई एक करोड धरौटीमा रिहा हुने आदेश दिएको थियो । तर सोही मुद्धामा रुपन्देही जिल्ला अदालतका न्यायाधीश वशिष्ठकुमार घिमिरेको इजलासले पुर्पक्षका लागि थुनामा पठाउने आदेश गरेको थियो ।उक्त आदेशविरुद्ध उच्च अदालत गएपछि रविलाई धरौटीमा छोड्ने आदेशविरुद्ध सरकारी वकिलले उच्च अदालतमा पुनरावेदनको निवेदन दिएको थियो । उक्त निवेदनपछि रविले पनि आफ्नोविरुद्ध धरौटीको आदेश बदर गरी साधारण तारेखमा राख्ने माग लिएर पुनरावेदन निवेदन दिएका थिए ।रविलाई यसअघि चार ओटा सहकारी ठगीमा २ करोड ७९ लाख धरौती तिराएर साधारण तारेखमा छाडिएको थियो । रवि जेल गएसँगै रास्वपाभित्र फेरि विचलन आउने देखिएको छ । उनी यसअघि कार्तिक २ गते पक्राउ परेका थिए । गत कार्तिक २ गते काठमाडौँमा पक्राउ परेपछि उनी सांसदबाट निलम्बित भएका थिए । लामिछानेमाथि सम्पत्ति शुद्धीकरण मुद्दा लागेपछि सङ्घीय संसद् सचिवालयले गत पुस ८ गते सूचना निकालेर सांसद पद निलम्बन गरेको थियो ।कुर्सीमा रहन नपाएको साढे पाँच महिनापछि रवि गत १८ गते पुनः सभापतिको कुर्सीमा बसेका थिए । उच्च अदालतको आदेशपछि पक्राउ परेका रवि अब भने सहजै उम्किने अवस्था देखिँदैन ।