धनगढी  । उद्योग, पर्यटन, वन र वातावरणमन्त्री लक्ष्मणकिशोर चौधरीले विवादित अडियो सार्वजनिक भएपछि पदबाट राजीनामा दिएका छन्। उक्त अडियोमा दिगो वन व्यवस्थापनसम्बन्धी कार्यविधि आफू अनुकूल बनाएर ठूलो आर्थिक लाभ लिने प्रयासको छलफल रहेको थियो। अडियो सार्वजनिक भएपछि चौधरीले शनिबार राजीनामा दिएका थिए।मन्त्री चौधरीको राजीनामा पछि नागरिक उन्मुक्ति पार्टी (नाउपा) ले आन्तरिक छलफल सुरु गरेको छ। पार्टीका संरक्षक रेशम चौधरी र अध्यक्ष रञ्जिता श्रेष्ठ प्रमुख नेताहरूसहित धनगढी पुगेका छन्। छलफलमा संघीय सांसद गंगा चौधरी, अरुण चौधरी र लालवीर चौधरी, साथै प्रदेशसभाका सांसदहरू पनि सहभागी छन्।धनगढीको एक होटलमा जारी छलफलमा अडियो प्रकरण र पार्टीको भविष्यका बारेमा गम्भीर बहस भइरहेको छ। नाउपाका नेताहरूले मन्त्रीको राजीनामा पछि पार्टीको नेतृत्व र आगामी कदमहरू बारे चर्चा गरिरहेका छन्।विपक्षी दलहरूले आर्थिक लेनदेनको अडियो सार्वजनिक भएपछि मन्त्री चौधरीमाथि छानबिन गर्ने उच्चस्तरीय समिति गठन गर्नुपर्ने र सरकारका अन्य विवादास्पद नियुक्तिहरूको जवाफ दिने माग गरेका छन्। आज पनि प्रदेशसभा बैठक अवरुद्ध भएको छ।