काठमाडौं, २३ चैत/चीनको सांघाइमा कोरोना संक्रमण दर तीब्र बनेको छ । कोरोना तीब्र बनेपछि चिनियाँ अधिकारीहरूले सांघाइमा जारी निषेधाज्ञालाई दुई करोड पचास लाख जनसंख्यामा लागु हुने गरी बिस्तार गरेका छन ।
सांघाइको सबै भूभाग समेट्ने गरी अनिश्चितकालीन निषेधाज्ञा जारी गरिएको छ । सांघाइमा हालसम्म निषेधाज्ञा जारी भएको चीनको पहिलो ठूलो एकल सहर हो ।
सांघाइतमा एक महिना यता कोरोना संक्रमण तीब्र बन्दै गइरहेको छ । हाल दिनहुँ १३ हजारभन्दा बढी संक्रमित थपिने गरेको त्यहाँका स्वास्थ्य अधिकारीहरूले बताएका छन ।
कडा निषेधाज्ञाका कारण कोही पनि आफ्नो घर बाहिर निस्कन पाउने छैनन । उनीहरूलाई अत्यावश्यक सामग्री जोहो गर्न समेत बन्देज लगाइएको छ ।
स्थानीय बासिन्दाहरूले अनलाइनमार्फत खाद्यान्न र पानी मगाउन समेत कठिनाइ भएको बताएका छन ।
निषेधाज्ञामा उनीहरूले आफ्नो आवश्यकता अनुरूप सामान कहिले माग गर्ने भन्नेमा पनि कडाइ गरिएको छ ।
अहिले सांघाइमा महामारी रोकथाम तथा नियन्त्रण गर्न निकै नै कठिन भइरहेको महानगरीय स्वास्थ्य आयोगका अधिकारी हु क्वेन्सीले बताए । उनले कोरोनालाई परास्त गर्न सबैले स्वास्थ्य मापदण्ड अपनाउनु पर्ने बताएका छन ।
सोमबार मात्रै सांघाइमामा १३ हजार ८६ जनामा लक्षणसहितको कोरोना पुष्टि भएको छ ।