फूलवारी । लामो समयदेखि एमसिबी खसेर बत्ती जान थालेपछि फूलवारीका स्थानीयहरु आक्रोसित भएका छन् । कैलालीको धनगढी,१९ नवदुर्गा चोकमा रहेको ट्रान्सर्फमरको एमसिबी बारम्बार खसेर बत्ती जादां स्थानीयहरु आक्रोसित भएका हुन् । 

गर्मीको समयमा हरेक राती अत्यधिक लोडका कारण एमसिबी खस्ने, फ्यूज जाने समस्या भएको स्थानीय दिपेन्द्र चौधरीले बताए । उनले गर्मीको समयमा संधै यस्तै समस्या हुनेगरेको बताए । 

नवदुर्गाचोकमा राखिएको १०० केबीको ट्रान्सर्फमरले यस क्षेत्रको लोड व्यवस्थापन गर्न नसक्ने भएकाले गाँउमा ५० केबी क्षमताको अर्को ट्रान्सर्फमर थप्नुपर्ने चौधरीले बताए ।  

गर्मीको समयमा बत्ती,पंखा,कुलर जस्ता बढि लोड चाहिने उपकरण चलाउंदा सय केबीको ट्रान्सर्फमरले लोड उठान नसक्दा पटक पटक बत्ती जाने गरेको स्थानीय डबल बहादुर रोकायले बताए । उनले चर्को गर्मीमा बत्ती जाँदा जनताले सास्ती खेप्नुपरेको बतांउदै यस क्षेत्रको बिद्युत लोड व्यवस्थापन हुनेगरी काम गर्न विद्युत् प्राधिकरणलाई आग्रह गरे ।

नेपाल बिद्युत प्राधिकरण कैलालीका प्रमुखले सो समस्याको बारेमा आफुलाई जानकारी नभएको बताए । उनले सो विषयमा बुझेर समस्या समाधानको प्रयास गर्ने फूलवारी खबरलाई बताए ।