डडेल्धुरा १२साउन डडेल्धुरालगायत प्रदेश नं ७ का पहाडी जिल्लामा पाइने निउरो स्थानीयको आम्दानी स्रोत बन्न थालेको छ । बर्षातको समय खास गरी साउन–भदौमा खोला किनारमा पाइने बनस्पती निउरोबाट प्रदेश नं ७ को पहाडी जिल्लाका ग्रामीण स्थानमा बसोवास गर्ने स्थानीयले दैनिक दुईदेखि तीन हजारसम्म आम्दानी गर्ने गरेका छन् । निउरो तरकारीको रुपमा उपभोग गरिने भएकाले स्थानीय जंगलको निउरोप्रति आकर्षित भएका हुन् । स्थानिय बजारमा नै निउरो प्रति किलोग्राम २० रुपैयाँका दरले बिक्री हुने गरेको छ । टुसा पलाएको चाररपाँच दिन भित्र निउरोे नझिके ठूलो झ्याङ भएको उनिउ बन्छ । चाररपाँच दिनमै हर्लक्कै बड्ने भएका कारण स्थानीयले प्रत्येक दिन खोला किनारबाट निउरो झिकी बिक्री गर्ने गरेका छन । प्रदेश नं ७ का मुख्य सडकसँग पहुँच भएका तथा मुख्य राजमार्गसंग जोडिएका स्थानीयहरुले वर्षातका समयमा निउरो बिक्रीबाटै घर खर्च चलाउने गरेका छन । जंगल एवं खोलाका किनारमा बसोवास गर्नेहरुलाई निउरोेसंगै च्याउ खेतीसमेत गर्ने गरेका छन् । डोटीको गैराका व्यापारी जनक बोहोरा एक जनाले कम्तीमा एक क्विन्टल भन्दा बढी निउरो ल्याउने गरेको बताउँछन । ‘गैरामा गाँउबाट ठूलो परिमाणको निउरो आउने गरेको छ । खासगरी डोटीका पर्ने हगुल्टे लेकलगायत क्षेत्रका स्थानीयले जंगलको निउरो टिपेर बेच्ने गरेका छन् । डडेल्धुराको पोखराका अर्का व्यापारी भक्त शाहुले प्रति किलोग्राम २० रुपैयाँका दरले निउरो किन्ने गरेको र कैलाली, कञ्चनपुरसम्म पुग्दा प्रतिकिलोग्राम ५० रुपैयाँ सम्ममा बिक्री हुने गरेको बताउँछन् । कैलाली, डोटी, डडेल्धुरा, बैतडी तथा बझाङका बजार तथा ग्रामीण क्षेत्रबाट निउरो प्रदेश नं ७ का तराईका जिल्ला कैलाली,कञ्चनपुरलगायत भारतसम्म पुग्ने गरेको व्यापारीहरु बताउँछन ।