विराटनगर- चाडपर्व नजिकिँदै गर्दा सीमावर्ती जोगवनी नाकाबाट सामानको तस्करी तीव्र बनेको छ। अरु बेला ‘सेटिङ’मा हुने तस्करीमा ‘आँखा’ चिम्लिने सुरक्षानिकायले अहिले तस्करीका फुटकर सामान धमाधम पक्राउ गर्न थालेको छ। सशस्त्र प्रहरी, सीमा सुरक्षा कार्यालयले ६ लाख ८४ हजार रुपैयाँ बराबरको भन्सार छलीको सामान बरामद गरेको छ। सशस्त्र प्रहरीका एसपी भेषबहादुर शाहको कमाण्डमा खटिएका टोलीले विभिन्न ९ खालका तस्करीको सामान बरामद गरेको हो। सशस्त्र प्रहरीले लहंगा ठूलो ८ पिस, लहंगा सानो ७ पिस, बच्चाको जामा १६ पिस, कुर्तासुरुवाल १ पिस, सेन्ट १ सय ५० पिस, ग्रनी हर्बल स्याम्पो ३७ पिस, पाउडर १३ केजी, फेस क्रिम ८१ पिस र साडी २ सय २५ पिस बरामद गरेको छ। विराटनगर महानगरपालिका १५ स्थित रामजानकी मन्दिर नजिकबाट मारुती भ्यानमा राखिएको भन्सार छलीका सामान सशस्त्र प्रहरीले बरामद गरेर विराटनगर भन्सार कार्यालय बुझाएको छ। सुनसरी इनरुवा नगरपालिका वडा २ बस्ने रोहित गुरुङले को१च ९८८८ नम्बरको मारुती सुजुकी भ्यानमा ती सामान भारतबाट नेपालतर्फ ल्याएको सशस्त्र प्रहरीको भनाइ छ। यता, इलाका प्रहरी कार्यालय रंगेलीले भारतबाट भन्सार छलेर नेपालतर्फ ल्याउँदै गरेको सुर्ती, रासायनिक मल, चिनी, तेल लगायतका सामान नियन्त्रणमा लिएको छ। इलाका प्रहरी कार्यालय रंगेलीले बरामद गरेको समान लिलामीका लागि भन्सारमा बुझाएको इन्सपेक्टर सन्जीवबाबु खड्काले जानकारी दिए। प्रदेश नम्बर १ प्रहरी कार्यालयका अनुसार सीमावर्तीको तस्करी नियन्त्रण गर्ने अभियान अन्तर्गत मोरङ र सुनसरीबाट प्रहरीले १ लाख बढीको सामान बरामद गरेको छ। सुनसरीको कोसी गाउँपालिका–८ बाट मात्रै ४३ हजार मूल्य बराबरको कुर्तासुरुवाल बरामद गरेको हो।