धनगढी । धनगढीमा पर्यटन फोटो पत्रकारिता तालिमको दोस्रो संस्करण सुरु भएको छ। नेपाल पर्यटन बोर्ड (एनटीबि) र संयुक्त राष्ट्रसंघीय विकास कार्यक्रम (यूएनडीपी)को सहकार्यमा सञ्चालन भइरहेको दिगो पर्यटन परियोजना (एसटीपी) अन्तर्गत राष्ट्रिय फोटो पत्रकार समूह नेपाल (एनएफपीजे) र नेपाल पत्रकार महासंघ कैलालीसँग समन्वयमा दुइदिने तालिम शुरू गरिएको हो।
पर्यटन प्रवर्द्धन, दृश्य अभिलेखन, ब्रान्ड निर्माण तथा स्थानीय तहमा पर्यटनमा सहभागिता बढाउने उद्देश्यसहित आयोजित तालिममा सुदूरपश्चिमका नौवटै जिल्लाबाट करिब ३५ जना पत्रकार सहभागी भएका छन्।
उद्घाटन कार्यक्रमलाई सम्बोधन गर्दै नेपाल पत्रकार महासंघ सुदूरपश्चिम प्रदेशका अध्यक्ष भरत शाहले तालिमले प्रदेशको पर्यटन अभियानलाई नयाँ उचाइमा पुर्याउने विश्वास व्यक्त गरे। “सुदूरपश्चिम धार्मिक, सांस्कृतिक तथा प्राकृतिक पर्यटनका दृष्टिले अत्यन्त सम्भावनायुक्त प्रदेश हो। पत्रकारहरूको दक्षता अभिवृद्धि गर्ने यस्तो कार्यक्रमले दीगो पर्यटन विकासमा महत्वपूर्ण योगदान पुर्याउँछ,” उनले भने।
नेपाल पत्रकार महासंघ कैलालीका अध्यक्ष श्रवण देउवाले पत्रकारको क्षमतावृद्धि र गुणस्तरीय सामग्री उत्पादनका लागि यस्ता तालिम आवश्यक रहेको बताए । उनले भने, “मिडियाको स्तर सुधार्ने सबैभन्दा प्रभावकारी माध्यम नै सिपमा आधारित तालिम नै हो ।” राष्ट्रिय फोटो पत्रकार समूह, नेपालका अध्यक्ष प्रदीपराज वन्तले फोटो पत्रकारिता पर्यटन प्रवर्द्धनको आधारभूत साधन भएको उल्लेख गर्दै भने, “एक उत्कृष्ट तस्बिरले हजार शब्द बोल्छ । नेपाललाई लेन्समार्फत विश्वमा चिनाउन सकियो भने पर्यटन प्रवर्द्धनमा महत्वपूर्ण भूमिका खेल्नेछ ।”
तालिमका सहभागीले फील्ड अभ्यासका क्रममा शुक्लाफाँटा राष्ट्रिय निकुञ्जको जैविक विविधता, वन्यजन्तु, घाँसेमैदान, प्राकृतिक आकर्षण र पर्यटन सम्भावनाहरू अवलोकन गर्दै ‘उच्चस्तरको फोटो–डोकुमेन्टेसन’ तयार गर्नेछन् ।
पहिलो सत्रमा नेपाल पर्यटन बोर्डका सञ्चार परामर्शदाता दिलिप प्रकाश कार्कीले पर्यटन पत्रकारिताको आधारभूत प्रक्रिया र सञ्चार रणनीतिबारे प्रशिक्षण दिएका थिए । उनले भने, “मिडिया गन्तव्य र आगन्तुकबीच पुलको काम गर्ने भएकोले पत्रकारहरुले दीगो र उत्तरदायी पर्यटन प्रबर्द्धनका लागि आफ्नो लेखनलाई केन्द्रित गर्नुपर्दछ । प्रभावकारी तस्बिरहरूले गन्तव्यको कथा विश्वभर पुर्याउन सक्ने भएकोले गन्तव्यको ब्रान्डिङमा ध्यान दिनुपर्दछ ।”
फोटो पत्रकार तथा प्रशिक्षक सुनिल चुडा बज्राचार्य, प्रकाशचन्द्र तिमिल्सेना र प्रदीपराज वन्तले फोटो पत्रकारिताको विकासक्रम, फ्रेम निर्माण, तस्बिर कथा निर्माण, प्रकाश–छायाँको व्यवस्थापनलगायत विषयमा सैद्धान्तिक तथा व्यावहारिक प्रशिक्षण सञ्चालन गर्नेछन् । कार्यक्रमको सहजीकरण एनएफपीजेका कोषाध्यक्ष प्रदीप श्रेष्ठले गरेका थिए । यसअघि पहिलो संस्करण कोशी प्रदेशको विराटनगरमा तालिम सञ्चालन गरिएको थियो भने तेस्रो संस्करण गण्डकी प्रदेशको पोखरामा सञ्चालन गरिनेछ ।
तपाइको प्रतिक्रिया दिनुहोस्