धनगढी।कहिले काँडाको कुहिरो, कहिले उज्यालो किरण — जीवन यस्तै बन्छ कहिले काँही। यस्तै एक अद्भुत जीवनकथा रचेकी छन् कञ्चनपुरकी ३५ वर्षीया रिमा डगौरा। उनले एकैसाथ डेंगु, स्क्रब टाइफस, मलेरिया, लेप्टोस्पायरोसिस, ब्रुसेलोसिस र दुवै फोक्सोमा निमोनिया जस्ता ६ घातक सङ्क्रमणहरूलाई परास्त गरेकी छन्। त्यो पनि संजीवनी अस्पताल, धनगढीमा डा. सुमन चौधरीको नेतृत्वमा भएको सफल उपचारपछि।डा. सुमन चौधरीरिमा जब अस्पताल भर्ना भइन्, उनी उच्च ज्वरो, टाउको दुखाइ, असह्य पीडा र चरम कमजोरीले छटपटाइरहेकी थिइन्। शुरूमा सामान्य संक्रमण लागेझैं देखिए पनि लक्षणहरू गम्भीर बन्दै गएपछि चिकित्सकहरूले विस्तृत परीक्षण गरे। परीक्षणका क्रममा एकपछि अर्को घातक रोगको खुलासा हुँदै गयो — यस्तो संयोजन चिकित्साशास्त्रमै दुर्लभ मानिन्छ।“उहाँको अवस्था अत्यन्तै जटिल थियो,” डा. चौधरी सम्झिन्छन्, “तर हाम्रो समर्पित टोलीले चुनौतीलाई स्वीकार गर्‍यो।”रगतको कमी, कलेजोमा असर र फोक्सोको दुबै भागमा फैलिएको निमोनियाले अवस्था नाजुक बनाइरहेको थियो। तर, समयमै थालिएको समन्वित उपचार, सतर्क निगरानी र चिकित्सकहरूको अदम्य समर्पणले उनले पुनः जीवन पाउन सकिन्।“अब उहाँको अवस्था स्थिर छ र चाँडै डिस्चार्ज गर्ने तयारी भइरहेको छ,” डा. चौधरीले जानकारी दिए।डा. चौधरीले वर्षायाममा यस्ता उष्णदेशीय रोगहरूको जोखिम अत्यधिक हुने भन्दै सावधानी अपनाउन आग्रह गरे — झुलको प्रयोग, सरसफाइ र शरीरमा देखिने संकेतप्रति संवेदनशील रहनुपर्ने उनको सुझाव छ।जीवनसँगको यो लडाइँ जितेपछि रिमाको आँखामा अहिले आशा र नयाँ सुरुवातको चमक देखिन्छ। भावुक हुँदै उनले भनिन्, “यो त मेरो दोस्रो जन्मजस्तै हो। मलाई बचाउन जुन समर्पणका साथ चिकित्सकहरू खटिनुभयो, त्यो म आजन्म बिर्सिन सक्दिन।” उनले संजीवनी अस्पतालको सम्पूर्ण टोलीप्रति आभार व्यक्त गरिन्। यो विजय केवल एक बिरामीको मात्र होइन, समर्पण, संवेदना र समयमै गरिएको उपचारको सशक्त सन्देश हो ।