धनगढी दुई दिन लगातार परेको अविरल वर्षापछि आएको बाढीले क्षति पुगाएको गोदावरी धामको नेपाली सेनाले सरसफाई गरेको छ । साउन २२ र २३ गते परेको अविरल वर्षाले कैलालीको गोदावरी नगरपालिका—४ स्थित गोदावरी धाम क्षेत्रमा क्षति पुगाएको थियो । श्री गुरुबक्स गुल्मका निमिक्त गुल्मपति सह सेनानी सरोज कोइरालाको कमाण्डमा श्री सुदूरपश्चिम पृतना हेड क्वार्टर र श्री सर्वेश्वर गणबाट खटिएको नेपाली सेनाको संयुक्त टोलीले मन्दिर भित्र जम्मा भएको बालुवा तथा माटो हटाएको हो । अवरोध हटाईएसंगै दर्शनार्थीलाई मन्दिर दर्शनका लागि सहज भएको  श्री देवीदल गण तेघरीका प्रमुख सेनानी गणपति रबी के.सी. ले बताए । बाढीले गोदावरी धाम क्षेत्रमा रहेका मन्दिरमा ढुङ्गा, माटो, बालुवा, काठका मुढा, झारपात थुपारिदिएपछि दर्शनार्थीले मन्दिरको दर्शन गर्न पाएका थिएनन् ।‘मन्दिर परिषरमा बस्ने योगीहरुको खाद्यान्न बाढीले क्षति पुगाएको थियो’ तेघरीका प्रमुख सेनानी गणपति के.सी.ले भने, ‘खाद्यान्ना समेत सुरक्षित स्थानमा टोलीले व्यवस्थापन गरेको छ ।’प्राकृतिक विपत्तिबाट धनजनको क्षति नहोस् भनेर नेपाली सेनाको विपद् उद्धार टोली कैलालीमा सक्रियता पूर्वक खटिएको उनले बताए ।