कैलाली, ३१ भदौ। सुदूरपश्चिम प्रदेशमा पाँच दलीय गठबन्धन दलले प्रदेशका १६ मध्ये ७ क्षेत्रमा भागबण्डा टुङ्ग्याएको छ। सत्तारुढ पाँच दलीय गठबन्धन दलका नेताहरुले लगातारको छलफलपछि प्रतिनिधिसभातर्फ प्रदेशका ७ निर्वाचन क्षेत्रमा भागबण्डा टुङ्ग्याएका हुन्। स्रोतका अनुसार प्रदेशका अन्य ९ क्षेत्रको भागबण्डा भने मिल्न सकेको छैन।

भागबण्डा मिल्न नसकेको क्षेत्रमा छलफल जारी रहेको जनाइएको छ। मंसिर ४ गते हुने प्रदेश र प्रतिनिधीको निर्वाचनका लागी गठबन्धनमा रहेका नेताहरुलाई अहिले भागबण्डा टुङ्ग्याउन सकस परिरहेको छ। लामो समयपछि मात्रै केही क्षेत्रमा सहमती र भागबण्डा टुङ्गो लागेपनी आधा भन्दा बढी क्षेत्रमा सहमती हुन सकेको छैन।

हालसम्म गठबन्धनमा भएको सहमतीअनुसार डडेल्धुरामा कांग्रेसबाट शेरबहादुर देउवा र कैलाली निर्वाचन क्षेत्र नम्बर ५ मा कांग्रेसकै आरजु देउवालाई सबै दलले समर्थन गर्ने सहमती जुटेको छ। यस्तै कञ्चनपुरको निर्वाचन क्षेत्र नम्बर १ मा माओवादी केन्द्रको भागमा परेको छ। क्षेत्र नम्बर २ र ३ नेपाली कांग्रेसले लिने सहमती भएको छ भने बाजुरा र दार्चुला पनि कांग्रेसले लिने जनाइएको छ। तर कैलालीका चार वटा निर्वाचन क्षेत्र, बैतडी, डोटी, बझाङ, अछामका दुई क्षेत्रमा भने सहमती जुट्न नसकेको बताइएको छ।