धनगढी । धनगढी १४ को शिक्षा समितिले उपमहानगरपालिकाले गरेको विद्यालय समायोजन सम्बन्धि निर्णयको विरोध जनाएको छ । आज बुधवार बसेको वडा शिक्षा समितिको बैठकले उपमहानगरपालिकाले अबैज्ञानिक ढंगले विद्यालय समायोजन गर्ने निर्णय गरेकाले विरोध जनाएको बताइएको छ । वडाका सम्पूर्ण विद्यालय व्यवस्थापन समितिका अध्यक्ष, प्रधानाध्यापक,जनप्रतिनिधि, समाजसेवी, बुद्धिजिबीको सहभागिता रहेको बैठकले सो निर्णयको बिरोध गरेको हो । यहि साउन १५ गते बसेको धनगढी नगरकार्यपालिका बैठकले केही विद्यालय गाभ्ने र केहीका कक्षाहरू नजिकका विद्यालयमा समायोजन गर्ने निर्णय गरेको थियो । सोही निर्णय अनुुसार धनगढी १४ एच गाउँ स्थित सिद्धार्थ आधारभुत विद्यालयलाई सर्बोदय माध्यामिक विद्यालय सी गाउँमा गाभिएको थियो । सम्बन्धित विद्यालय र वडा संग छलफल नगरी उपमहानगरले सो निर्णय गरेको भन्दै वडा शिक्षा समिति लगायत स्थानीयले विरोध जनाएका छन् ।साथै बैठकले विद्यालय समायोजन गर्दा त्रुटि भएको भन्दै निर्णयमाथी पुर्नविचार गर्न उपमहानगरपालिकालाई सिफारिस गर्ने निर्णय गरेको छ ।