बैतडी । बैतडीको सिगास गाउँपालिका अध्यक्ष हरिसिंह धामीले उपभोक्ता समितिका अध्यक्षमाथि कुटपिट गरेका छन्। स्थानीय कान्धार–देउलेक सडक उपभोक्ता समितिका अध्यक्ष वीरसिंह धामीलाई पालिका अध्यक्ष धामीले कुटपिट गरेका हुन्। पालिका अध्यक्षको कुटाइबाट घाइते भएका धामी जिल्ला अस्पताल बैतडीमा भर्ना भएका छन्। पालिका अध्यक्ष धामीले लाठी र लात्ताले कुटपिट गर्दा उनको हात, कम्मर, खुट्टालगायतका ठाउँमा घाउ भएको छ।

गत मंगलबार वडा नं। ४ मा रहेको उक्त सडकमा उपभोक्ताले काम गरेबापत रु २० लाख ४४ हजार रकमको चेक दिएको थियो। उक्त चेक साट्न पालिका केन्द्र गर्जेबाट उपभोक्ता समितिका अध्यक्ष धामी बुधबार गाँजरीमा रहेको कृषि विकास बैंक पुगेपछि पालिकाले फिर्ता बोलाएको थियो। उक्त सडकमा पैसा थपेर अर्को चेक काटिदिने भन्दै फिर्ता बोलाएको घाइते धामीले बताए। अर्को दिन बिहीबार पालिका गएपछि कर्मचारीहरुसँग बिवाद भएको र त्यही बेला पालिका अध्यक्षले निहुँ खोज्दै कुटपिट गरेको उनले बताए।

‘मलाई यत्तिकै पालिका बोलाएका रहेछन्, विना कारण चेक साट्न नदिएपछि कर्मचारीहरुसँग बिवाद भयो’ जिल्ला अस्पताल बैतडीमा भर्ना भएका उनले भने ‘त्यसपछि पालिका अध्यक्ष धामी आएर सुरुमा लात्तै लात्ताले कुट्नु भयो, १५र१६ लात्ता हिर्काएपछि लाठीले कुट्नु भयो। त्यसपछि म त्यहीँ ढलें।’

गाउँकै आफन्तहरुले ढलेको ठाउँबाट उठाएर ल्याउन लाग्दा पालिका अध्यक्षले उल्टै रातभरी प्रहरी चौकीमा थुन्न लगाएको उनको आरोप छ। बिहान मात्र प्रहरीले छोडेपछि आफन्तहरुले शुक्रबार उपचारका लागि अस्पताल ल्याएका थिए । उपभोक्ता समितिले गरेका कामबाट पालिका अध्यक्षले कमिसन मागेको र नपाएपछि कुटपिटमा उत्रिएको पीडितका आफन्तको आरोप छ।

पालिका अध्यक्ष धामीले भने उपभोक्ता समितिका अध्यक्ष वीरसिंहले मदिरा सेवन गरेर पालिका कर्मचारी र अध्यक्षसँग दुब्र्यवहार गरेको दाबी गरेका छन्। उपभोक्ता समिति अध्यक्ष धामीले किर्ते कागजपत्र बनाएर भुक्तानी लिएको थाहा पाएपछि बैंकलाई चेक नसाट्न अनुरोध गरेको उनले बताए। कमिसन मागेको भन्ने झुटा आरोप लगाएको भन्दै उनले पालिकाको लेटरप्याड प्रयोग गरी विज्ञप्ती जारी गरेका छन्। आफूले कुटपिट नगरेको समेत पालिका अध्यक्ष धामीको दाबी छ।

कान्धार देउलेक सडकमा चालु आर्थिक बर्षमा रु ५० लाख रकम बिनियोजन भएपनि ३९ लाखको सम्झौता गरेको उपभोक्ताहरुले बताएका छन्। सडक खन्ने क्रममा स्थानीय जयसिंह धामीले २० ड्रम इन्धन दिएको र उक्त इन्धनको सात लाख रकम मागेको घाइतेका आफन्त शेरसिंह धामीले बताए। इन्जिनियरले नापजाँच गरेर चेक काटिसकेपछि पुनः पालिका बोलाएर अध्यक्षले कुटपिट गरेको उनले बताए।