कैलालीको सुखडमा रविका समर्थकहरूले कान्तिपुर पत्रिका जलाए
धनगढी । कैलालीमा रवि लामिछानेका समर्थकहरूले कान्तिपुर दैनिक पत्रिका जलाएका छन्। घोडाघोडी नगरपालिकास्थित सुखड बजारमा आज बिहान केही युवाहरूले कान्तिपुर बहिष्कार गर्ने भन्दै पत्रीका जलाएका हुन्।
राष्ट्रिय स्वतन्त्र पार्टी रास्वपाका सभापति रवि लामिछाने विरुद्ध समाचार लेख्दै आएको भन्दै उनीहरूले कान्तिपुर पत्रिका जलाएका छन् ।
आइतबार पत्रकार सम्मेलन गर्दै लामिछानेले नेपाली मिडियामाथि असन्तुष्टि जनाएका थिए । मिडियाले गलत भूमिका खेलेको दाबी गर्दै उनले त्यसको विरोध गरेका थिए । उनले केही पत्रिका र अनलाइनको नाम लिँदै आफू विरुद्ध गलत समाचार लेखिएको खण्डमा घेर्न आउने बताएका छन्।
