धनगढी । संघीय सरकारमा नजाने तर समर्थन गर्ने निर्णय गरेको नागरिक उन्मुक्ति पार्टीले सुदूरपश्चिममा पनि बाहिर बसेर सहयोग गर्ने जनाएको छ । सोमबार पार्टीका संस्थापक रेशम चौधरीसँग भएको छलफलपछि सरकारमा नजाने निर्णय लिएको उन्मुक्ति पार्टीले बाहिर बसेर समर्थन गर्ने जनाएको छ ।

यस्तो बेला फेरिएको समीकरणअनुसार सुदूरपश्चिम प्रदेश सरकार निर्माण पनि निर्णायक देखिएको उन्मुक्ति पार्टीले के गर्ला ? भन्ने जनचासो बढेको छ । पार्टीका प्रवक्ता दामोदर पण्डितले सुदूरपश्चिममा पनि संघीय गठबन्धनलाई नै समर्थन गर्ने तर सरकारमा नजाने निर्णय भएको जानकारी दिए ।

‘प्रदेशमा पनि हाम्रो भूमिका संघीय सरकारमा जस्तै रहन्छ,’ पण्डितले भने, ‘माग पूरा नभएकाले तत्काल बाहिर बसेर सहयोग गछौँ । संघीय समीकरण भन्दा दायाँबायाँ हुने अवस्था छैन ।’ यस्तो अवस्थामा उन्मुक्ति पार्टीको समर्थनमा यहाँ नेकपा माओवादी केन्द्र ११ र नेकपा एमाले १० को सरकार बन्नेछ ।

५३ सदस्यीय प्रदेशसभामा सरकार गठन गर्न २७ जना आवश्यक पर्छ । एमाले, माओवादी, उन्मुक्ति र राप्रपा मिल्दा सरकारको पक्षमा २९ जना पुग्ने देखिन्छ ।
उन्मुक्ति पार्टीले रेशम चौधरी लगायत टीकापुर घटनाका बन्दीहरुको रिहाइ, झुठा मुद्दा खारेज तथा टीकापुर घटनापछि गिरिशचन्द्रलाल नेतृत्वको आयोगले तयार पारेको प्रतिवेदन सार्वजनिक गर्नुपर्ने मागहरु अघि सारेको छ ।

यी माग पूरा भए मात्र सरकारमा सहभागी हुने उसले जनाएको छ ।