काठमाडौँ, ४ कात्तिक । नेपाली सेनाको त्रिभुवन आर्मी क्लब १७२ स्वर्ण, ११० रजत र ८९ कांस्यसहित कुल ३७१ पदकका साथ नवौँ राष्ट्रिय खेलकुद २०७९ को च्याम्पियन बनेको छ । सहभागी अन्य १० टोलीलाई पछि पादै आर्मी च्याम्पियन बनेको हो। 

च्याम्पियन बनेका आर्मीलाई प्रधानमन्त्री शेरबहादुर देउवाले राष्ट्रिय खेलकुदको ट्रफी हस्तान्तरण गरेका थिए। आयोजक राखेपले करिव १० लाख खर्च गरी यस वर्षदेखि ट्रफी  बनाएको हो

यसैगरि उपविजेता बनेको सशस्त्र प्रहरीको एपीएफ क्लबले ६५ स्वर्ण, ७३ रजत र ८१ कांस्य गरी कुल २१९ पदक हात पार्न सफल भएको छ ।

प्रतियोगितामा तीन विभागीय, सात प्रदेश र एनआरएनए गरी ११ टोली सहभागी थिए । प्रदेशतर्फ भने सहभागी सात प्रदेश मध्ये घरेलु टोली गण्डकी ३२ स्वर्ण, ३१ रजत र ५७ कांस्य गरी कुल १२० पदक प्राप्त गर्न सफल भएको छ ।

प्रतियोगितामा सहभागी कुल ३६ खेलका ३९६ विधामा पुरुष तीन हजार ४१४, महिला दुई हजार ७१३ गरी कुल ६ हजार १२७ जना खेलाडीहरूले प्रतिस्पर्धा गरेका थिए । प्रतियोगिता मा समावेश गरिएका ३६ खेलहरू गण्डकीका आठ जिल्लामा सञ्चालन गरिएको थियो । 

सहभागी खेलाडीहरूमध्ये कान्छो खेलाडीको रूपमा रितिका बुमी रहेकी थिइन । ७ वर्ष २२ दिनकी बुमी पौडी खेलाडी हुन भने सुदूरपश्चिम प्रदेशबाट सहभागी भएकी थिइन । 

यसै गरी जेठो खेलाडीको रूपमा धनबहादुर घले रहेका थिए । प्रदेश १ बाट स्क्वास खेलमा भाग लिएका घले ६१ वर्ष ४ महिनाका हुन ।

यसैबिच प्रत्येक दुई दुई बर्षमाहुने प्रतियोगिताको आउँदो १० औ संस्करण कर्णाली प्रदेशमा हुने भएको छ । २ देखि ९ मंसिर २०८१ मा कर्णालीमा १० औ संस्करण हुने भएको हो। 

राखेपको पोखरामा बसेको ११५ औँ बोर्ड बैठकले सो निर्णय गरेको राखेपका सदस्य सचिव टङ्कलाल घिसिङले जानकारी दिए । गण्डकीमा नवौँ संस्करण सकिएसँगै आउँदो १० औ संस्करणको तयारीमा बिहीबारबाटै सुरु भएको उनले बताएका थिए ।

नवौँ संस्करणसम्म आईपुग्दा पहिलो पटक राष्ट्रिय खेलकुदको ट्रफी निर्माण गरिएको छ । पहिलो पटक राष्ट्रिय खेलकुदमा खेलकुदको विश्व मान्यता अनुरूप क्लिन स्पोर्टसको  अवधारणा अनुरूप एन्टि डोपिङ परीक्षण गरिएसँगै  खेलाडीहरूको विवरण डिजिटल माध्यमबाट दर्ता गरी क्लाउडमा अभिलेखीकरण गरिएको सदस्य सचिव घिसिङले जानकारी दिए।