धनगढी, ४ असोज। अनसनरत डाक्टर गोविन्द केसीले काठमाडौँ जान नमानेपछि नेपाली सेनाको स्काई ट्रक फर्किएको छ । ९ दिनदेखि चिकित्सा क्षेत्रको सुधारसहित विभिन्न ७ बुँदे माग राखेर आमरण अनशनमा रहेका डा। केसीले काठमाडौं जान नमानेपछि साँझ ५ बजेतिर नेपाली सेनाको स्काई ट्रक फर्किएको हो। उनलाई स्वास्थ्यमा समस्या देखीएपछि सेती प्रादेशिक अस्पतालमा भर्ना गरिएको थियो।

केसीको स्वास्थ्य स्थिति झन् जटिल बनेपछि थप उपचारका लागि काठमाडौं लैजान सरकारले मंगलबार दिउँसो हेलिकप्टर स्काई ट्रक धनगढी ल्याएको थियो। केसीले आफ्नो स्वास्थ्य अवस्था समान्य रहेको दाबी गर्दै काठमाडौँ जान अस्वीकार गरेपछि धनगढी पुगेको सेनाको स्काई ट्रक फर्किएको जिल्ला प्रशासन कार्यालयका सूचना अधिकारी शिवराज जोशीले जानकारी दिए। स्वास्थ्य मन्त्रालयको आग्रहमा गृह मन्त्रालयले केसीलाई काठमाडौँ लैजान मंगलबार दिउँसो नेपाली सेनाको स्काई ट्रक धनगढी पठाएको थियो।

डा.केसीले आफूलाई जबरजस्ती लगिए “अपहरण” हुने चेतावनी दिएका थिए । उनको स्वास्थ्यजाँचमा खटिएका डाक्टर अमृत जैशीले डा। केसीको भनाई उधृत गर्दै भने– म कुनै हालतमा पनि सेती प्रादेशिक अस्पतालबाट अन्यत्र जान्न । यदि जबरजस्ती लगियो भने यो अपहरण हुनेछ । चिकित्सकहरुले डा। केसीको स्वास्थ्य अवस्था दिनप्रतिदिन थप जटिल बन्दै गएकोले बहुविशेषज्ञसहितको विशिष्टकृत अस्पतालमा लैजानुपर्ने सल्लाह दिँदै आएका छन् । सोमबारदेखि उनको पेटमा अल्सर भई आन्तरिक रक्तश्रावको समस्या देखिएको छ ।

औषधि सेवन नगर्दा उनको स्वास्थ्य स्थिति गम्भीर भएकाले प्रादेशिक अस्पतालले मंगलबार बिहान विज्ञप्ति जारी गर्दै उनलाई विशिष्ट स्वास्थ्य सुविधा भएको अस्पतालमा लैजान सामाजिक विकास मन्त्रालय, राष्ट्रिय मानवअधिकार आयोग र संघीय स्वास्थ्य मन्त्रालयलाई जानकारी पठाएको छ। उनी उपचाररत सेती प्रादेशिक अस्पतालका चिकित्सकले डा।केसीको पेटमा कडा खालको अल्सरको लक्षण देखिएको भनेपछि सेनाको स्काईट्रक मार्फत काठमाडौं पठाउने तयारी गरेको जिल्ला प्रशासनले कार्यालय कैलालीका सूचना अधिकारी शिवराज जोशीले बताएका थिए ।स्वास्थ्य क्षेत्रको समग्र सुधारको सात बुँदे मागसहित डा। केसीले नौ दिनअघि धनगढी–१, एलएनचोकस्थित कृष्णमन्दिरको धर्मशालामा २० औं सत्याग्रह शुरु गरेका हुन् । उनको स्वास्थ्यस्थिति बिग्रिन थालेपछि दुई दिनपछि सेती प्रादेशिक अस्पताल लगिएको थियो ।