धनगढी, ३ वैशाख/निर्वाचन आयुक्त डाक्टर जानकी तुलाधरले संविधानले तोेकेको जिम्मेवारी पूरा गर्न निर्वाचन आयोग तत्पर रहेको बताइन । 
निर्वाचन आयोगले आज धनगढीमा आयोजना गरेको मिडिया अभिमूखीकरण कार्यक्रमको उद्घाटन गर्दै डाक्टर जानकी तुलाधरले आयोग आफ्नो जिम्मेवारी पूरा गर्न तत्पर रहेको बताइन् । ‘स्थानीय तहको निर्वाचन सफल रुपले सम्पन्न गर्न आयोग तालिका अनुसार अगाडि बढिरहेको छ’ डाक्टर तुलाधरले भनिन्, ‘सबै एकताबद्ध भएर यो निर्वाचन सफल पार्नुपर्छ ।’ बदर मत संख्या घटाउन आयोगले मतदाता शिक्षा कार्यक्रमलाई प्रभावकारी ढङ्गले अगाडि बढाउने तुलाधरले बताइन् । उनले निर्वाचन सफल पार्नमा सञ्चार जगतको भूमिका महत्वपूर्ण रहने बताइन् ।
कार्यक्रममा प्रेस काउन्सिल नेपालका सदस्य हरिप्रसाद जोशीले सञ्चार जगत र पत्रकारले पालना गर्नुपर्ने आचारसंहिता बारेमा प्रस्तुति गरेका थिए । 
कार्यक्रममा आयोगका उपसचिव सूर्यप्रसाद अर्यालले मतपत्रबारेमा जानकारी गराएका थिए । नेपाल पत्रकार महासंघका महासचिव रोशन पुरीले पत्रकारले कुनै दलको कार्यकर्ता नभइ पत्रकारिताको आचारसंहितामा रहेर कलम चलाउन आग्रह गरे । कार्यक्रममा कैलालीका ५० पत्रकारको सहभागिता रहेको थियो ।