धनगढी, १८ पुस/धनगढी उपमहानगरपालिकाका नगर प्रमुख तथा नेपाली काँग्रेसका केन्द्रीय सदस्य नृपबहादुर वडले वडामा तत्काल टोल समिति गठन गरेर बिकास काम अगाडि बढाउन निर्देशन दिएका छन् ।
नेपाली काँग्रेस धनगढी उपमहानगरपालिकाको वडा नम्बर ९ को नवनिर्वाचित पदाधिकारी, सदस्य, क्षेत्रीय प्रतिनिधिहरुलाई निर्वाचित भएको प्रमाण पत्र हस्तान्तरण तथा वडाको पहिलो बैठकमा बोल्दै नगर प्रमुख तथा नेपाली काँग्रेसका केन्द्रीय सदस्य नृपबहादुर वडले सो कुरा बताएका हुन् । 
‘तपाईहरुको पहिलो बैठकबाट टोल समिति गठन गर्ने निर्णय गर्नुहोस् ।’ केन्द्रीय सदस्य नृपबहादुर वडले भने, तपाईको वडामा कति टोल समिति बनाउन सकिन्छ बनाउनुहोस् । त्यो टोल समितिले हरेक महिना बैठक बस्ने । त्यो टोल कमिटीका संयोजकलाई हरेक महिना वडा कमिटीको बैठकमा बोलाउनुहोस् । टोलमा भएको काम । परेको समस्याबारे छलफल गर्नुहोस् । समाधानका लागि पहल गर्नुहोस् । तपाईले गर्नसक्ने काम तपाईहरु गर्नुहोस । त्यहाँबाट सम्भव नभएका काम नगरमा भन्नुहोस् ।’ नगर प्रमुख वडले भने, ‘काँगे्रसका मात्र कुरा नगर्नुहोस् । कम्युनिष्ट छन् भने पनि उनीहरुलाई परेको अप्ठ्यारा, समस्या समाधान गर्नुहोस् । जस्तै मलाई भन्छन् नि त मसंग जुन सुकै पार्टीका आएपनि मैले सक्ने उनीहरुको काम गर्छु । कसैलाई समस्या परेको छ र तपाईले समस्या समाधान गरे पो त्यो मान्छे तपाईको हुन्छ । यताउता नसोच्नुहोस् काम गर्नुहोस् । पराईलाई पनि आफ्नो बनाउन लाग्नुहोस् । अरु पनि सोच्न बाँध्य हुन्छन् । काँग्रेससंग लाग्दा, बस्दा, हिड्दा उपलब्धी हुन्छ भनेर । जसलाई समस्या परेको छ त्यसको समस्या समाधान गरेपछि त्यो तपाईहरुकै मान्छ बन्छ ।’