धनगढी,पुष २५/ शनिबार प्रमुख प्रतिपक्षी दल नेपाली काँग्रेसले प्रतिनिधिसभा विघटनको विरोधमा सुदूरपश्चिममा पनि प्रर्दशन गर्ने भएको छ।

केन्द्रीय कार्य समितिको निर्णयअनुसार काँग्रेसले कैलालीसहित सुदूरपश्चिमका ९ जिल्लाका विभिन्न स्थानमा शनिबार दिउँसो विरोध प्रर्दशन गर्ने जनाएको छ।

काँग्रेसले कैलालीमा मात्र १० ठाउँमा प्रर्दशनसहित विरोध सभाको आयोजना गर्दैछ। दिउँसो १२ बजे धनगढीको पार्क मोड, फूलबारी, गोदावरी नगरपालिकाको अत्तरिया, गौरीगंगा नगरपालिकाको मसुरिया, पहलमानपुरमा पनि विरोध सभाको आयोजना गरिएको छ।

यस्तै बौनिया बजार, टीकापुर, जोशीपुर, हसुलिया र लम्कीमा पनि प्रर्दशनसहित विरोध सभाको आयोजना गरिने काँग्रेसले जनाएको छ।

प्रधानमन्त्री केपी शर्मा ओलीले प्रतिनिधिसभा विघटन गरेर असंवैधानिक काम गरेको विरोधमा काँग्रेसले प्रर्दशन गरिरहेको हो।