काठमाडौं,१८पौष। औपचारिक रुपमा मात्र विभाजन भएको घोषण हुन बाँकी सत्तारुढ नेकपाको प्रचण्ड–माधव समूहले प्रधानमन्त्री केपी शर्मा ओलीलाई पार्टी अध्यक्षबाट हटाएको आधिकारिक जानकारी निर्वाचन आयोगलाई दिएको छ ।
प्रधानमन्त्री ओलीलाई पार्टी अध्यक्षबाट हटाएर माधव नेपाललाई अध्यक्ष बनाइएको पत्र बिहीबार निर्वाचन आयोगमा दर्ता गरिएको नेकपा स्थायी कमिटी सदस्य लिलामणि पोखरेलले जानकारी दिए ।
उनले भने, ‘राजनीतिक दल सम्बन्धी ऐनको दफा १८ मा विधान विपरीत काम गर्ने पदाधिकारीलाई कारवाही गर्न सकिने प्रावधान छ, त्यसैअनुसार ओलीजीलाई कारवाही गरिएको जानकारी आयोगलाई दिएका हौं ।’
७ पुसमा बबरमहलमा बसेको नेकपा प्रचण्ड–माधव समूहको केन्द्रीय कमिटी बैठकले ओलीलाई अनुशासनको कारवाही गर्ने निर्णय गरेको थियो । एकता हुँदाको आधिकारिक ४४१ मध्ये ३१५ जना केन्द्रीय सदस्यको उपस्थितिमा बसेको बैठकले ओलीलाई कारवाही गर्ने निर्णय गरेको थियो । ओली पक्षले भने बबरमहल बैठकलाई ‘गुटको भेला’ भन्ने गरेको छ ।
विभाजनको अन्तिम विन्दुमा पुगेको नेकपामा अहिले ओली र प्रचण्ड–माधव दुवै समूहले आफूलाई आधिकारिक दाबी गर्दै अर्को पक्षलाई छुटिएको सानो गुट भन्ने गरेका छन् । तर यसको छिनोफानो निर्वाचन आयोगले गर्नुपर्ने हुन्छ । यी दुई समूहमा अहिले पार्टीको आधिकारिकतासँगै ‘सूर्य’ निर्वाचन चिन्ह कसले पाउने भन्नेमा पनि लडाइँ चलिरहेको छ ।
आयोगले आधिकारिक नेकपा कुन पक्ष हुन्छ त्यही पक्षले सूर्य निर्वाचन चिन्ह पाउने बताएको छ ।
यसअघि भृकुटीमण्डपमा १४ गते भएको वृहत विरोधसभामा माधव नेपालले पार्टीबाट ओलीलाई हटाइनसकेको र अन्तिम मौका दिएको भनेका थिए ।