धनगढी, ०७ साउन । देशका सात वटा प्रदेशमध्ये सबैभन्दा बढी कोरोना भाईरसका एक्टिभ संक्रमित रहेको प्रदेश सुदूरपश्चिम बनेको छ। जम्मा कोरोना संक्रमितको संख्या सुदूरपश्चिम भन्दा बढि प्रदेश २ र प्रदेश नम्वर ५ मा भएपनि एक्टिभ संक्रमित भने सबैभन्दा बढि सुदूरपश्चिममा रहेको स्वास्थ्य तथा जनसंख्या मन्त्रालयले जनाएको छ।

 मन्त्रालयका प्रवक्ता डाक्टर जागेश्वर गौतमका अनुसार देशका सात प्रदेशमध्ये सुदूरपश्चिममा सबैभन्दा बढि एक्टिभ संक्रमित अर्थात निको नभएका कोरोना संक्रमितको संख्या बढि रहेको छ। देशभरी पाज्ँच हजार चार सय ७७ एक्टिभ केस रहेकोमा सुदूरपश्चिममा एक्टिभ कोरोना संक्रमित एक हजार नौँ सय १७ जना रहेका छन्। 

मन्त्रालयका अनुसार सुदूरपश्चिममा कोरोना संक्रमितको संख्या चार हजार एक सय २७ पुगेको छ। संक्रमण पुष्टि भएका दुई हजार दुई सय दुई जना डिस्चार्ज भएका छन् भने ८ जनाको मृत्यु भईसकेको छ। स्वास्थ्य तथा जनसंख्या मन्त्रालयका अनुसार अहिलेसम्म सबैभन्दा बढि कैलालीका नौँ सय ८३ जनामा संक्रमण पुष्टि भएको छ।

यस्तै अछाममा ६ सय ४५, डोटीका ६ सय ३०, बाजुराका ६ सय १६ जनामा संक्रमण पुष्टि भएको मन्त्रालयले जनाएको छ। कञ्चनपुरका चार सय ८३, डडेल्धुराका दुई सय ९७, बैतडीका दुई सय ७६, बझाङका एक सय ७७ र दार्चुलाका २० जनामा संक्रमण पुष्टि भएको हो।