काठमाडौं,३साउन।आउँदो सोमबारदेखि ५ दिन देशभर भारी वर्षाको सम्भावना रहेको छ ।

जल तथा मौसम विज्ञान विभागका अनुसार मनसुन सुरु भएयता परेको पानीले पहाड र चुरे क्षेत्रका अधिकांश भू–भाग गलिसकेकाले अब ५ दिन पर्ने र पानीले पहिरोको सम्भावना बढेको विभागले जनाएको हो ।

मनसुन सुरु भएयता देशका विभिन्न स्थानमा बाढी र पहिरोले ठूलो क्षति पुर्याएको छ । प्रदेश १, प्रदेश २, वाग्मती प्रदेश, गण्डकी प्रदेश र प्रदेश ५ का केही स्थानमा भारी वर्षाको सम्भावना रहेको विभागद्वारा आज ९शुक्रबार० काठमाडौंमा आयोजित पत्रकार सम्मेलनमा जानकारी दिइएको छ ।

कर्णाली प्रदेश र सुदूरपश्चिम प्रदेशका थोरै स्थानमा भारी वर्षा हुने सम्भावना रहेको विभागको भनाइ छ । नेपालमा मनसुन सुरु भएदेखि हालसम्म मनसुनजन्य विपदका घटनाबाट ११० जनाको मृत्यु भएको छ । उनीहरुको बाढी–पहिरो, चट्याङ, सर्पदंशलगायतका मनसुनजन्य घटनाबाट मृत्यु भएको हो ।

अझै ३२ जना बेपत्ता रहेका छन् भने १३२ जना घाइते भएका छन् । विपदबाट ४१८ परिवार प्रत्यक्ष प्रभावित भएको छ । पहिरोका कारण मात्रै ८१ जनाको मृत्यु भएको छ । चट्याङबाट १७, सर्पदंशले १० र बाढीका कारण दुई जनाको मृत्यु भएको छ । देशका ३३ जिल्लामा विपदबाट मानवीय क्षति भएको छ भने ६० जिल्लामा विपदका घटना भएको छ ।