धनगढी, १२ माघ – धनगढी उप-महानगरपालिका वडा नम्बर ४ निवासी खगेश्वर विनाडी र सुमन विनाडीले छोरीको जन्मदिनमा मानव सेवा आश्रमलाई खाद्यान्नसहित नगद सहयोग गरेका छन् । छोरी शुयंशाको जन्मदिनको अवसर पारेर धनगढी उप महानगरपालिका वडा नम्बर ४ तारानगरमा सञ्चालित मानव सेवा आश्रमलाई नगद र खाद्यान्न सहयोग गरिएको हो ।
शुयंशा चौथो वसन्त पार गरी पाँचौँ वसन्तमा प्रवेश गरेको शुभ अवसर पारेर विनाडी परिवारले आइतबार आश्रमको धनगढी शाखामा उक्त सहयोग हस्तान्तरण गरेका हुन् ।
बुवा खेमराज विनाडी, आमा कृष्णा देवी विनाडी र छोरी शुयंशासहित आश्रममा पुगेका विनाडी दम्पतीले कैलाली उद्योग वाणिज्य सङ्घका सचिव तथा मानव सेवा आश्रम धनगढी शाखाका सल्लाहाकार सिद्ध राज पनेरुको उपस्थितिमा उक्त सहयोग हस्तान्तरण गरेका थिए ।

सहयोग हस्तान्तरण गर्दै विनाडी दम्पतीले मानव सेवा आश्रमले गरेको मानवीय धर्मको प्रशंसा गर्दै उक्त सहयोग हस्तान्तरण गरे । पछिल्लो समय होटेल तथा रेस्टुराहरुमा तामझाम गरेर मनाइने कार्यक्रम भन्दा असहायहरूलाई सहयोग गरेर समाज सेवाको भावना सबैमा जागृत गराउन सहयोग गरिएको उनीहरूको भनाई छ ।
खाद्यान्न हस्तान्तरणका क्रममा शुयंशाका हजुरबुबा खेमराज विनाडीले सडकमा रहेका असहायहरूलाई आश्रमसम्म पु¥याएर मानवता प्रवर्द्धनको अभियानमा संलग्न रहेका सम्पूर्ण अभियन्ताहरूलाई धन्यवाद ज्ञापन गर्दै आफूले पनि नातिनीको जन्मदिनमा असहायहरूलाई सहयोग गर्न पाएकोमा खुसी व्यक्त गरे ।

सहयोग हस्तान्तरण कार्यक्रममा अभियन्ता तथा सल्लाहाकार पनेरुले आफू उक्त अभियानमा सुरुवाती चरणबाटै आबद्ध रहेको बताए । ‘आगामी दिनमा यस्तै सहयोगी हातहरूको सहयोगले हाम्रो अभियान अझै प्रभावकारी बन्दै जाने छ ।’ उनले भने, ‘असहाय मानवरहित सडक बनाउने अभियान अन्तरगत प्रदेशका अन्य जिल्लामा समेत यो अभियान थाल्ने योजना अघि सारेका छौँ । पहाडी जिल्लाहरूका लागि डडेल्धुरामासमेत शाखा खोल्ने तयारी अघि बढिसकेको छ ।’
सहाराविहीनहरूको सहारा मानव सेवा आश्रम बन्दै आएको भन्दै उनले सम्पूर्ण सहयोगी निकायहरूलाई धन्यवाद दिए ।
सडकमा रहेका असहायहरूलाई आश्रमले उद्धार गर्ने गरेको छ । हाल आश्रमको धनगढी शाखामा ३८ जना असहायहरू रहेका छन् । उनीहरूको बसोबाससहित उपचारको व्यवस्था आश्रमले गर्दै आएको छ ।

मानव सेवा आश्रम कैलाली शाखाले २०७५ मङ्सिर ६ गते जिल्ला प्रशासन कार्यालय कैलाली बाट औपचारिक स्वीकृत प्राप्त गरेको थियो ।