डोटी, २० पौष – राष्ट्रिय सभा सदस्य निर्वाचनका लागि सुदूरपश्चिम प्रदेशमा नेकपा र नेपाली काँग्रेसले उम्मेदवारी मनोनयन दर्ता गराएका छन् । डोटी जिल्ला अदालतमा स्थापना गरिएको मुख्य निर्वाचन अधिकृतको कार्यालयमा आइतबार दुई दलका ४ जना उम्मेदवारले मनोनयन दर्ता गराएका हुन् ।

सुदूरपश्चिम प्रदेशमा एक खुल्ला र एक जना महिलाका लागि निर्वाचन हुदैछ । जसमा सत्तारुढ नेपाल कम्युनिस्ट पार्टीका तर्फबाट खुल्लातर्फ तारामान स्वाँर र महिलातर्फ शारदा भट्टको उम्मेदवारी दर्ता भएको छ ।

नेपाली काग्रेसका तर्फबाट महिलातर्फ तुलसी देवकोटा र खुल्लामा प्रताप ठगुन्नाले उम्मेदवारी दर्ता गराएका छन् । दुवै पार्टीले दलबलसहित मुख्य निर्वाचन अधिकृतको कार्यालय पुगेर उम्मेदवारी दर्ता गराएका हुन् ।

उम्मेदवारी दर्ता पछि उम्मेदवारहरूले पत्रकारहरूसँग प्रतिक्रिया दिँदै मतदातालाई आफूलाई मतदान गर्न आह्वान गरे । सुदूरपश्चिम प्रदेशमा ८८ स्थानीय तहका एक सय ७६ गाउँपालिकाका अध्यक्ष/उपाध्यक्ष र नगरपालिकाका मेयर/उपमेयरको १८ का दरले गरी तीन हजार एक सय ६८ र प्रदेश सभाका ५३ जना सांसदको ४८ का दरले गरी दुई हजार पाँच सय ४४ गरी कुल पाँच हजार ७ सय १२ मत भार रहेको छ ।

२०७४ माघमा भएको राष्ट्रिय सभा निर्वाचनमा सुदूरपश्चिमबाट खुल्लातर्फ निर्वाचित सांसद नेपाली काँग्रेसका बद्री पाण्डे र महिलातर्फबाट निर्वा्चित भएकी नेकपाकी सांसद कमला ओलीको पदावधि दुई वर्ष कायम भएको थियो । उनीहरूको रिक्त हुन लागेको ठाउँमा निर्वाचन हुन लागेको हो ।

सुदूरपश्चिममा राष्ट्रिय सभा निर्वाचनका लागि २ सय २९ मतदाता
सुदूरपश्चिम प्रदेशमा राष्ट्रिय सभा निर्वाचनका लागि २ सय २९ मतदाता रहेका छन् । प्रदेश सभाका ५३ र स्थानीय तहका १ सय ७६ गरी प्रदेशका ९ वटै जिल्लामा २ सय २९ मतदाता रहेका छन् ।

सुदूरपश्चिम प्रदेश सभामा तीन दलको सहभागिता रहेको छ । नेकपाका सबैभन्दा बढी ३९ सदस्य रहेका छन्, भने नेपाली काँग्रेसका १२ र राष्ट्रिय जनता पार्टीका २ सदस्य प्रदेश सभामा छन् ।

यता ८८ वटा स्थानीय तहमा रहेका १ सय ७६ जना मतदाता मध्य १ सय ३ जना नेपाल कम्युनिस्ट पार्टी९नेकपा०बाट निर्वा्चित र ७३ जना नेपाली कांग्रेसबाट निर्वाचित छन् ।