धनगढी, ३० कात्तिक/धनगढी उप–महानगरपालिका वडा नम्वर १४ को कार्यालयमा गरिएको तालाबन्दी अझै खुल्न सकेको छैन् । वडा स्वास्थ्य चौकीको निर्माणस्थलका विषयमा विवाद हुँदा वडा कार्यालयमा बिहीबार तालाबन्दी गरिएको थियो । वडा कार्यालयले वडा नम्वर १४ को ‘सि’ गाउँ स्थित राम मन्दिर नजिक स्वास्थ्य चौकी निर्माणको प्रक्रिया अगाडी बढाएपछि एच गाउँका स्थानीयले वडा कार्यालयमा तालाबन्दी गरेका हुन् ।
उनीहरुले प्रसुती गृह पनि एच गाउँमै भएकोले सोही स्थानमा स्वास्थ्य चौकी निर्माण गर्नुपर्ने माग राख्दै आएका छन् । शुक्रबार सर्वदलीय बैठ्कबाट सहमति जुटाउने प्रयास असफल भएको छ ।
यता वडा नम्वर १४ का वडा अध्यक्ष रामबजारी चौधरीले भने सि गाउँमा स्वास्थ्य चौकी निर्माण गर्ने निर्णय भईसकेकोले सोही स्थानमा निर्माण गरिने बताए । वडा कार्यालयको भवन पनि सोही स्थानमा निर्माण हुने भएकोले स्वास्थ्य चौकी पनि सि गाउँमै उपयुक्त भएको उनको दावी छ ।