कैलाली, २८ कात्तिक/ चिकित्सा क्षेत्र सुधार र स्वास्थ्य सेवामा आम नागरिकको समान पहुँचको माग राखेर सत्रौँ अनसनका लागि डडेलधुरा पुगेका डाक्टर गोबिन्द केसी नौ दिनसम्मको अनसन स्थगन गरेर काठमाण्डौं प्रस्थान गरेका छन् ।
उनी बुधवार बेलुका धनगढी स्थित सेती प्रादेशिक अस्पतालमा उपचारका लागि भर्ना भएका थिए । सेती प्रादेशिक अस्पतालमा स्वास्थ्य जाँच गराएर केसी आज दिउँसो ३ः२५ बजेको फ्लाइट मार्फत काठमाण्डौं प्रस्थान गरेका छन् ।
भारतले नेपालको भूमि आफ्नो राजनीतिक नक्सामा राखेर अन्याय गरेकोले देशका लागि लड्नुपर्ने बेला जनताका लागि लड्नु उपयुक्त नठानेर अनसन स्थगन गरेको केसीले बताए ।
‘पहिला देश, त्यसपछि जनता ।’ केसी भन्छन, ‘भारतले जुन नेपालमाथि अन्याय गरेको छ । पहिला त्यसका लागि हामी सबै एकजुट हुनु पर्दछ । त्यसैले अनसन स्थगन गर्नु परेको हो । यद्यपि यो चिकित्सा क्षेत्र सुधार र स्वास्थ्य सेवाको पहुँच विस्तारको लडाइँ भने अन्त्य भएको छैन ।’
सरकारले चिकित्सा क्षेत्रको बेथिति र स्वास्थ्य सेवाको पहुँच विस्तारमा आफूले अघि सारेका माग सम्बोधन नगरे आफ्नो लडाइँ भने सास रहुन्जेलसम्म निरन्तर जारी रहने केसीको भनाई छ ।
भारतले सीमा मिचेको विषयमा आफ्नो निर्णय सच्याउन्जेल सरकार आफ्ना माग सम्बोधनमा सकारात्मक नदेखिए अनसन फेरी थाल्ने केसीको भनाइ छ ।
उनले त्यसपछिको अनसन कहाँबाट थाल्ने भन्ने विषय भने खुलाएनन् । ‘म समग्र देशवासीका लागि लडेको हुँ ।’ केसीले भने, त्यसैले त्यो अनसन थाल्नु पर्ने परिस्थिति सिर्जना भएको खण्डमा झापाबाट पनि हुनसक्दछ, अथवा फेरी डडेलधुराबाट पनि ।’