धनगढी, २७ कात्तिक – नेपाली काँग्रेस संसदीय दलले सीमा अतिक्रमण लगायत समसामयिक विषयमा सुदूरपश्चिमका मुख्यमन्त्री त्रिलोचन भट्टको ध्यानाकर्षण गराएको छ ।

बुधवार मुख्यमन्त्री कार्यालयमा पुगेर लिम्पियाधुरा, कालापानी लगायतको भूमिमा भएको अतिक्रमणको पहल, संसद् सुचारु र चालू आर्थिक वर्षका योजना कार्यान्वयनका विषयमा सरकारको ध्यानाकर्षण गराएको नेपाली काँग्रेस संसदीय दलका नेता डा. रण बहादुर रावलले जानकारी दिए ।

उनले सीमाका विषयमा सरकारले केन्द्रको मुख ताकेर बस्नुभन्दा पनि प्रदेश सरकारले आफ्नै भूमि मिचिएको विषयमा तदारुकता भएर समन्वयात्मक भूमिका खेल्नुपर्ने बताए ।

कांगे्रस संसदीय दलका नेताहरू मुख्यमन्त्री कार्यालयमै पुगेर छलफलमा सहभागी भएका थिए । सरकारले विगत लामो समयदेखि बन्द रहेको संसद् सुचारुका विषयमा समेत पल नगरेको भन्दै ध्यानाकर्षण गराइएको रावलको भनाइ छ ।

साथै सरकारले चालू आर्थिक वर्षको बजेटमा अघि सारिएका योजना र प्रतिपक्षीसँगको सम्झौता कार्यान्वयनका लागि समेत ध्यानाकर्षण गराएको जानकारी दिए ।

यस विषयमा सुदूरपश्चिमका मुख्यमन्त्री त्रिलोचन भट्टले भने सङ्घ सरकारसँग पहल गर्ने बताएका छन् । सरकारले संदस सुचारुका विषयमा सरकारले पहल गरिरहेको पनि भट्टले बताए ।