कैलाली ३१ भाद्र/ सुदूरपश्चिम प्रदेशमा डेंगु र स्क्रब टाइफसको संक्रमण भयावह बन्दै गएको छ । प्रदेशका बाजुरा बाहेक अरु सबै आठ जिल्लामा डेंगुको संक्रमण देखिएको छ भने अछाम र बाजुराबाहेक अरु जिल्लामा स्क्रबटाइफस देखिएको छ ।
सुदूरपश्चिम प्रदेशको सामाजिक विकास मन्त्रालयले जारी गरेको जानकारी अनुसार मंगलबारसम्म सुदूरपश्चिम प्रदेशमा ५० जनामा डेंगु र १०५ जनामा स्क्रब टाईफस देखापरेको छ ।
सुदूरपश्चिम प्रदेशमा सोमबारसम्म स्क्रब टाइफसका विरामी ७८ जना थिए भने यो संख्या २६ जनाले बढेर आइतबार १०४ जना स्क्रब टाइफसका विरामी पुगेका छन् ।
मन्त्रालयका अनुसार कैलालीमा २३, कञ्चनपुरमा नौं, दार्चुलामा नौं, डोटीमा दुई, डडेल्धुरामा तीन, बझाङमा एक, बैतडीमा एक र अछाममा दुई जनालाई डेंगुको संक्रमण भएको छ ।
त्यसैगरी, डडेल्धुरामा ५०, बैतडीमा १२, कैलालीमा २८, डोटीमा चार, कञ्चनपुर पाचँ, दार्चुला दुई र बझाङमा तिन जनामा स्क्रब टाइफस देखिएको छ । 
डेंगुबाट डोटीका एक जनाको अस्पतालमा उपचारकै क्रममा मृत्यु भएको भने धनगढीमा स्क्रबटाईफसबाट एक जनाको मृत्यु भएको छ । 

प्रदेशको सामाजिक विकास मन्त्रालयले डेंगु नियन्त्रणको लागि औषधि छर्किने, पानी जम्ने ठाउँमा लामखुट्टे नष्ट गर्ने, अस्पतालहरूमा ज्वरो आएका बिरामीलाई छुट्टै राखेर उपचार गर्न ज्वरो क्लिनिक सञ्चालन र भारतीय सीमानाकाहरूमा स्वास्थ्य परीक्षण डेस्क राखेर महामारी नियन्त्रणको काम भइरहेको जनाएको छ । 
मन्त्रालयका सूचना अधिकारी हेमराज खड्काले स्थानीय तहहरूसंगको समन्वयमा औषधि छर्किने र सफा पानी जम्ने ठाउँ खोजेर नष्ट गर्ने अभियान सञ्चालन भइरहेको बताए। उनले सफा पानी जम्ने ठाउँ खोजेर नष्ट गर्ने अभियानमा स्वास्थ्य स्वयंसेविका परिचालन गरिएको बताए। 
उनले ज्वरो आउने व्यक्तिलाई छुट्टै राखेर उपचार गर्न अस्पतालहरूमा ज्वरो क्लिनिक सञ्चालनका लागि समेत अस्पतालहरूलाई परिपत्र भइसकेको जानकारी दिए ।