धनगढी, ३ भदाै/धनगढीस्थित निसर्ग अस्पतालमा उपचारका क्रममा एक विरामीको मृत्यु भएको छ । कञ्चनपुरको भीमदत्त नगरपालिका–१२ का ५० वर्षीय मदनसिंह भण्डारीको सोमबार राति निधन भएको हो ।

भण्डारीको मृत्यु भएपछि मंगलबार विहान डाक्टरको लापरबाहीले विरामीको मृत्यु भएको भन्दै नाराबादीसहित अस्पताल घेराउ गरेका थिए ।

पछि अस्पताल प्रशासन र मृतकका आफन्तकाबीच मृतकको उपचार खर्च मिनाहा र क्रिया खर्च ब्यहोर्ने सहमति पछि अफान्तले शव बुझेका छन् । अस्पतालले विरामीको शल्यक्रिया सफल भएपछि हृदयघात हुँदा मृत्यु भएको जनाएको छ ।

दुई पक्षबीचको छलफलमा मृतकका आफन्तले पनि विरामीको हृदयघातका कारण मृत्यु भएको स्विकारेका छन् । यसअघि विरामीका आफन्तले चिकित्सकको लार्पवाहीले मृत्यु भएको भन्दै अस्पताल बाहिर नाराबाजी गर्दै हुलदंगा गरेपछि प्रहरीले भिड नियन्त्रण गरेको थियो ।

सोमवार बिहान ७ बजे पित्तथैलीको अप्रेसनका लागि मृतक भण्डारी अस्पताल भर्ना भएका थिए । उनको दिउँसो २ बजे पित्तथैलीको अप्रेसन गरिएको भएपनि राति १० बजे स्वास्थ्यमा समस्या देखिएको अवस्पतालले जनाएको छ ।

विरामीको शल्यक्रिया भएपछि आफन्तले विरामीलाई भेटेका पनि थिए । तर, १२ बजेको समयमा विरामीको मृत्यु भएको आफन्तलाई खबर गरिएको थियो ।