सन्तोष रोकाया, धनगढी २३ साउन कैलालीको धनगगढी उपमहानगरपालिका १८ आई गाउँका ५ नेपालीलाई भारतिय वन रक्षकहरुले नेपाल भारत दशगजाबाट पक्राउ गरी नेपाली ६ लाख ४० हजार रकम असुल गरेको खुलासा भएको छ । गत २१ गते शनिवार नेपाल भारत दशगजामा पर्ने एक खोलामा बगेको दाउरा चिर्दै गर्दा फूलवारी आई गाउँका धनिराम चौधरी,महेन्द्र चौधरी,सोभराम चौधरी,खडक चौधरी र रामु चौधरी पक्राउ परेका थिए । भारतिय वनकर्मीहरुले पाँचै जनालाई पक्राउ गरेर सोनाह वन बिभागमा लगेका थिए । पछि त्यहाँबाट दुधुवा नेस्नल पार्कमा ल्याएर बिभिन्न डर त्रास देखाएर ४ लाख भारतिय रुपियाँ लगेको पक्राउ परेका सोभराम चौधरीका वुवा खुसीराम चौधरीले जानकारी दिएका छन् । पैसा असुल्नेमा दुधुवा नेष्नल पार्कका अधिकृत श्रीवास्तब र अर्का एक वनकर्मी कमल पाल रहेको बुझिन आएको छ । आफुले तिरेको पैसाको रसिद दिन आग्रह पिडितहरुले गरे पनि भारतिय वनकर्मीहरुले रसिद नदिई एक हप्ता पछि दिने भन्ने गरेको उनिहरुबाट बुझिन आएको छ । पक्राउ परेका पाँचै जनालाई बाघको छाला, चितलको छाला र चितलको सिङ सँगै जिपमा राखेर लखिमपुर लिन आँटेको र लखिमपुरमा लगेर जेल चलाएन गर्ने भने पछि उनिहरु त्रसित भएको र जेल पर्नु भन्दा आफुहरुले ४ लाख भारु रुपियाँ तिर्न राजी भएको पक्राउ पर्ने मध्येका एक जना रामु चौधरीले जानकारी दिएका छन् ।