धनगढी । नागरिक उन्मुक्ति पार्टीले आजदेखि देशव्यापी रुपमा शशक्त आन्दोलनका कार्यक्रम अघि बढाउने निर्णय गरेको छ । 

टीकापुर घटनामा पार्टीका नेता रेश्म चौधरीलाई सर्वोच्च अदालतले जन्मकैदको सजाय सुनाएपछि पार्टीले आजदेखि विभिन्न चरणका आन्दोलनका कार्यक्रम अघि बढाउने जनाएको छ ।

उन्मुक्तिले बुधबार जारी गरेको विज्ञप्तीमा भनिएको छ –‘जेठ ३, ४ र ५ गते देशव्यापी राँके जुलुश, प्रदर्शनी, कोण सभाका कार्यक्रम गरिने छ र जेठ ६ देखि १० गतेसम्म नेपाल बन्द गर्ने घोषणा रहेको छ ।’

सर्वोच्च अदालतले लाल आयोग प्रतिवेदनलाई सार्वजनिक गरिनुपर्ने र रेश्म चौधरी लगायत टीकापुर राजबन्दी रिहा हुनुपर्ने आफना माग पुरा नभएको विज्ञप्तीमा उल्लेख छ ।

‘टीकापुर राजबन्दी हत्यारा हुन भने फासिदिने ऐन बनाएर रेश्म चौधरीलाई फासि दिए हुन्छ । यदि लाल आयोग प्रतिवेदन सरकारले सार्वजनिक गरेन भने हाम्रो अर्को विकल्प छैन’ विज्ञप्तीमा भनिएको छ–‘ हामी आन्दोलन गर्न विवस हुने छौं ।’

मंगलबार न्यायाधीशद्वय डाक्टर आनन्दमोहन भट्टराई र नहकुल सुवेदीको संयुक्त इजलासले टिकापुर नरसंहारका प्रतिवादी चौधरीलाई जन्मकैद गर्ने उच्च अदालत दिपायलको फैसला सदर गरेको हो । सर्वोच्च अदालतको फैसलासँगै तत्कालीन कानुनको आधारमा प्रतिवादी चौधरीलाई २० वर्ष कैद सजाय हुनेछ । 

चौधरी २०७४ फागुन १४ गतेबाट जेलमा बसेका उनी सामान्य अवस्थामा जेलमुक्त हुन अझै १४ वर्ष जेल सजाय काट्नुपर्ने हुन्छ ।