धनगढी । सुदूरपश्चिम प्रदेशको मुख्यमन्त्रीमा दाबी पेश गर्न आज ११ बजे सत्ता गठबन्धनका दलहरुको बैठक बस्दैछ । 

प्रदेशसभा संसदीय दलको कार्यालयमा बस्ने बैठकमा नेकपा एमाले, माओवादी केन्द्र, नागरिक उन्मुक्ति पार्टीका नेताहरु सहभागी हुनेछन् । 

बैठक लगत्तै प्रदेशप्रमुख कार्यालयमा मुख्यमन्त्रीको दाबी पेश गर्न जाने दलहरुको तयारी छ ।

नेकपा एमालेका नेता राजेन्द्रसिंह रावलले सुदूरपश्चिमको मुख्यमन्त्री पदमा दाबी गर्नेछन् । 

प्रदेश प्रमुख देवराज जोशीले बुधबारसम्म दाबी पेश गर्न दिएको अन्तिम दिनका दिन रावलले दाबी पेश गर्न लागेका हुन् ।

नागरिक उन्मुक्ति पार्टीले मंगलबार समर्थन गर्ने जनाएसँगै रावलका लागि मुख्यमन्त्री बन्ने ढोका खुलेको हो । रावलले एमालेसँगै माओवादी केन्द्र र नागरिक उन्मुक्तिका गरी कम्तीमा २८ सांसदको समर्थनसहित दाबी पेश गर्नेछन् ।

५३ सदस्यीय प्रदेशसभामा सरकार बनाउँन २७ संसद आवश्यक पर्छ । जसमा कम्तीमा एमालेका १०, माओवादी केन्द्रका ११ र नागरिक उन्मुक्ति पार्टीका ७ सांसदलाई लिएर रावलले दाबी पेश गर्न लागेका हुन् ।

त्यसबाहेक ४ सिट रहेको एकीकृत समाजवादी र एक एक सांसद रहेका स्वतन्त्र र राप्रपासँग पनि एमालेले सरकारमा ल्याउन वार्ता जारी राखेको छ ।

केन्द्रमा सुदूरपश्चिम सरकारको नेतृत्व एमाले र माओवादीले पालो पालो गर्ने सहमति भएको थियो । सोही सहमति अनुसार एमालेले मुख्यमन्त्री दाबी गर्दा सभामुख माओवादीको भाग परेको छ । सभामुखको निर्वाचन २८ गते हुने तय भएको छ । सभामुखमा माओवादीमा अक्कलबहादुर रावलको नाम चर्चामा छ ।