काठमाडौं । विराटनगर सुपर किङ्सलाई दुई रनले पराजित गर्दै नेपाल टी–२० लिगमा लुम्बिनी अलस्टार्सले लगातार दोस्रो जित निकालेको छ ।त्रिवि क्रिकेट मैदानमा लुम्बिनीले दिएको १ सय ५८ रनको लक्ष्य पछ्याएको विराटनगर निर्धारित २० ओभरमा ६ विकेट गुमाउँदै १ सय ५४ रनमा सीमित भयो ।
विराटनगरका हुसेन टलतले सबैभन्दा धेरै ३९ रनको योगदान गरे । उनले २४ बल खेल्दै ३ चौका र दुई छक्का प्रहार गरे ।ओपनर अर्जुन साउद १० रन, रोहित पौडेल २५ रन, सिकन्दर राजा १७ रन पृथु बास्कोटा १८ रन बनाए आउट भए ।
कप्तान आन्द्रे माकार्थी ११ र विवेक यादव १२ रनमा अविजित रहे ।लुम्बिनीको बलिङमा किसोर महत्तोले ४ ओभरमा १८ रन खर्चिएर दुई विकेट लिए । प्याट ब्राउन, गुलसन झा, दीपेन्द्रसिंह ऐरी र सागर ढकालले समान एक विकेट लिए ।
यसअघि, टस हारेर ब्याटिङ थालेको लुम्बिनीले निर्धारित २० ओभरमा ६ विकेट गुमाएर १ सय ५७ रनको योगफल तयार गरेको थियो ।लुम्बिनीका ओपनर मिलान्थाले अविजित ८० रनको उत्कृष्ट इनिङ खेले । उनले ६३ बलमा ५ चौका र ४ छक्का प्रहार गरे ।कुशल भुर्तेलले १७ बलमा २ चौका र १ छक्कासहित २६ रनको योगदान गरे । कप्तान दीपेन्द्रसिंह ऐरी १८ बलमा १६ रन जोडेर पभेलियन फर्किएका थिए ।
बिपुल शर्मा ११ रन बाहेक लुम्बिनीका अन्य ब्याटरले दोहोरो अंकमा रन बनाउन सकेनन् ।विराटनगरको बलिङमा कप्तान आन्द्रे माकर्थी, सिकन्दर राजा, शाहब अलाम र हुसन टलतले समान एक विकेट लिए ।
लुम्बिनी अलस्टार्सले पहिलो खेलमा फार वेस्टर्न युनाइटेडलाई ६७ रनले हराएको थियो ।आज हुने दोस्रो खेलमा पोखरा एभेन्जर्सर जनकपुर रोेयल्स खेल्दैछन् ।
