काठमाडौँ । काभ्रेपलाञ्चोकको बेथानचोक गाउँपालिकाको–४ स्थित चलाल गणेशस्थानमा हिजो साँझ भएको बस दुर्घटनामा परी मृत्यु भएका १७ जनामध्ये १४ जनाको सनाखत भएको छ।

मृत्यु हुनेमा बस चालक ललितपुरको महांकाल घर भइ पनौती ४ बस्ने २२ वर्षका सन्तोष तिमिल्सिना, बनेपा नगरपालिका १४ का ३९ वर्षका राजकुमार तामाङ, बनेपा ११ की ७९ वर्षकी निर्मला तामाङ, बनेपाकै ११ वर्षका योगेश तामाङ, ५० वर्षका अंकुर तामाङ, ४३ वर्षकी हेमा तामाङ, १० वर्षका पुष्कर तामाङ, २५ वर्षकी कोपिला तामाङ, ६ वर्षकी समिक्षा तामाङ रहेको जिल्ला प्रहरी कार्यालय काभ्रेले जनाएको छ।

यस्तै, काभ्रेको मण्डन देउपुर नगपालिका–१ बस्ने ३७ वर्षकी जेलि तामाङ, धुलिखेल नगरपालिका ११ बस्ने ३० वर्षका बुद्ध तामाङ, बेथानचोक गाउँपालिका ५ की ३२ वर्षकी मञ्जु तामाङ, बनेपा १४ बस्ने २८ वर्षकी गीता श्रेष्ठ र तेमाल गाउँपालिका ८ बस्ने २७ वर्षिया टिकालक्ष्मी तामाङको मृत्यु भएको जिल्ला प्रहरी कार्यालय काभ्रेले जानकारी दिएको छ।

प्रहरीका अनुसार २१ जन घाइतेको उपचार भइरहेको र एक जना डिस्चार्ज भएका छन्। हिजो साँझ ६ बजेतिर बनेपा नगरपालिका–११ बाट ब्रतबन्धका लागि बेथानचोकको – ५ स्थित च्याल्टी पुगेर फर्किँदै गरेको बा ३ ख ४३८५ नम्बरको रिजर्भ बस दुर्घटना भएको हो। जिल्ला प्रहरी कार्यालय काभ्रेका प्रहरी प्रमुख प्रहरी उपरीक्षक चक्रराज जोशीका अनुसार घाइतेहरुको बनेपाको शीर मेमोरियल र धुलिखेल अस्पतालमा उपचार भइरहेको छ।