रमेश ऐडी
धनगढी, १ कात्तिक । कैलाली जिल्लाको धनगढी–१९ फूलवारी स्थित क्लिनिकमा चोरी भएको छ । फुलबारी आई गाउं नबदुर्गा चोकमा रहेको अप्सरा क्लिनिकमा चोरी भएको हो ।

गएराती मेडिकलको माथिल्लो तल्लामा सुतिरहेको समयमा चोरी भएको अप्सरा क्लिनिकका संचालक भागीराम चौधरीले बताए । उनका अनुसार क्लिनिकमा पछाडीको ढोकाको चुक्कुल काटेर चोरहरु भित्र प्रबेश गरी लाखौंको सामान तथा नगद लगेका छन् ।

मध्यरातमा क्लिनिक भित्र प्रबेश गरेका चोरहरुले ल्याप्टप, दुई मोबाइल, आधा तोला बराबरका सुनका गरगहना, चांदिका चार ओटा बाला साथै मेडिकलको काउण्टरमा राखेको नगद एक लाख रुपिंया चोरेर लगेको मेडिकल संचालक भागीराम चौधरीले बताए ।

त्यस्तै गएराति नै सोही ठाउंबाट करिब ५ सय मिटर टाढा रहेको घरमा समेत चोरी भएको छ । स्थानीय प्रबिन बि.क का अनुसार आई गाउं दशकट्टा स्थित कोइली बिकको घरमा चोेरी भएको हो । रातिको समयमा घर भित्र प्रबेश गरी गरगहना, मोबाइल लगायत अन्य सामान लगेको स्थानीय बि.क बताए । 

ईलाका प्रहरी कार्यालय बहुलीयाका इन्चार्ज गोपाल कार्कीले घटना भएको थाह पाउने बित्तिकै प्रहरी पुगेर मुचुल्का तयार गरी जि.प्र.का पठाएको बताए । उनले भने, “भारतको सिमाना नजिक भएकाले रातीको समयमा पारिबाट चोरहरु आएर चोरी गरेको हुन सक्ने प्रहरीको अनुमान छ ।” उनले सो घटनाका चोर पत्ता लगाउन प्रहरी लागीरहेको बताए । उनले प्रहरीसंग प्रयाप्त जनशक्ति नभएकाले स्थानीय युवाहरु क्लब संग समन्वय गरी युवाहरु र सुरक्षाकर्मीहरु मिलेर रातीको समयमा गस्ती गर्नुपर्ने बताए ।  

धनगढी १९ का वडा सदस्य हरेन्द्र ऐडीले फूलबारी क्षेत्रमा बारम्बार चोरीका घटनाहरु हुने गरेको बताए । उनले गतबर्ष पनि आई गाउं स्थीत दिलिप रोकायाको घरबाट ४ लाख बराबर, आई गाउंमा रहेको श्री जनप्रीय आधारभूत विद्यालयका कम्प्युटरहरु चोरी भएको बताए । उनले चोरीका घटना नियन्त्रणका लागी सुरक्षाकर्मि लगायत युवाहरु चनाखो हुनुपर्ने बताए ।