प्रयाग जोशी
धनगढी, ३० असोज ।नेपाली काँग्रेससंग सम्बद्ध रहि गठबन्धन दलका आधिकारिक उम्मेदवार विरुद्ध वागी उम्मेदवार भएका उम्मेदवार र निजका प्रस्तावक, समर्थकहरुलाई पार्टीवाट निष्कासन गरिएको छ ।आगामी ४ मंसिरमा हुन गइरहेको प्रतिनिधि र प्रदेश सभा सदस्य निर्वाचनमा काँग्रेसका आधिकारीक उम्मेदवार र सत्तारुढ गठबन्धन पार्टीका आधिकारीक उम्मेदवार विरुद्ध उम्मेदवारी दिएका उम्मेदवारलाई कारवाही गरिएको जनाएको हो ।
सत्तारुढ गठबन्धन दलहरु र मधेश प्रदेशमा लोकतान्त्रिक समाजवादी पार्टीबीच भएको सहमती अनुरुप आधिकारीक उम्मेदवार विरुद्ध उम्मेदवारी दिई तोकिएको मितिमा उम्मेदवारी फिर्ता नलिएका प्रतिनिधि र प्रदेश सभा दुवै तर्फका उम्मेदवारलाई कारवाही गरिएको जनाइएको छ । 
उम्मेद्वारसहित प्रस्तावक र सर्मथकलाई नेपाली काँग्रेसको विधान २०१७ (संशोधन सहित) को धारा ३४ (१)(घ) उल्लंघन गरेकोमा धारा ३४ (४)(क)अनुसार  नेपाली काँग्रेसको साधारण सदस्य समेत नरहने गरि ५ वर्षका लागि पार्टीको केन्द्रीय कार्य समितिले निष्कासन गरेको व्यवहोरा अवगत गराउँदछौं, काग्रेस कैलालीका सभापति नारायणदत्त भट्टद्वारा हस्ताक्षरित विज्ञप्तिमा जनाइएको छ ।
कारवाहीमा पर्नेमा क्षेत्र नम्बर २ (ख) का भरतकुमार शाही र उनका समर्थक कमलकुमार विक, क्षेत्र नम्बर ३ का नविनकुमार बोहरा सोही क्षेत्रको प्रदेश (ख) का उम्मेद्वार गोविन्दराज जोशी उनका प्रस्तावक कमलबहादुर वडुवाल र समर्थक देवीराम खत्री क्षेत्र नम्बर ३ (ख) कै लक्ष्मण शाही, क्षेत्र नम्बर ४ (ख) का भगवती पाठक ओझा, क्षेत्र नम्बर ५ (ख) का क्षितिज भण्डारी र क्षेत्र नम्बर ५ मा संघीय स्वतन्त्र उम्मेदवारको समर्थक बसेका नवराज जोशीलाई कारवाही गरिएको छ । कैलाली क्षेत्र नम्बर ५ मा संघीय सांसदका लागि स्वतन्त्र उम्मेदवार पुस्करनाथ ओझा छन् ।