बैतडी, १८ असोज । हिन्दू नेपालीको महान चाड दशैँमा पनि सुदूरपश्चिम प्रदेशको पहाडी जिल्ला बैतडीमा हवाई सेवा सञ्चालन हुन सकेन । लामो समयदेखि बन्द रहेको हवाई सेवा दशैँमा पुनःसञ्चालन हुने भनिएको थियो । तर दशैँमा पनि सञ्चालन हुन नसकेको हो । समिट एयरले साप्ताहिक रुपमा उडान गर्दै आएकामा गत चैतदेखि बन्द रहेको धनगढी–बैतडी–धनगढी हवाई उडान सेवा बन्द छ ।

कहिले यात्रु नपाइने समस्या त कहिले मौसम खराबीका कारण यहाँको उडान सेवा छ महिनादेखि बन्द रहेको हो । यसअघि दशैँलाई लक्षित गर्दै यही असोज ८ गते शनिबारदेखि नियमित रुपमा हवाई उडान हुने जनाएको थियो । माथिबाटै दशैँमा यात्रु हुन्छन् भनेर असोज ८ देखि उडान भर्ने भनेर जानकारी आएको भए पनि यात्रु समस्याका कारण हुन नसकेको समिट एयर बैतडीका सम्पर्क व्यक्ति कृष्णदत्त भट्टले जानकारी दिए ।

साताको एक दिन बिहीबार समिट एयरले उडान भर्दै आएकामा गत चैत १० गते अन्तिम पटक उडान भएको थियो । भट्टले भने, ‘दशैँ, तिहारका बेला यात्रु नियमित रुपमा पाइन्छन् भनेर असोज ८ गतेदेखि फ्लाइट हुने जानकारी आएको थियो तर यात्रु अभावमा उडान हुन सकेन ।’

यसअघि बिहीबार हुँदै आएको हवाई उडान असोज ८ गतेदेखि हरेक शनिबार साप्ताहिक रुपमा धनगढी–बैतडी–धनगढी उडान हुने समिट एयरले जनाएको थियो । दशैँमा समेत यात्रु अभाव भएपछि अब भने कहिले उडान हुने भन्ने बारे अनिश्चित भएको छ । उनले भने, ‘चाडपर्वका बेला यात्रु हुन्छन् र नियमित उडान गर्ने तयारी थियो तर अब यसपछि कहिलेदेखि उडान हुने भन्नेबारेसमेत अनिश्चित भएको छ ।’