काठमाडौं,१०फागन । प्रमुख प्रतिपक्ष नेकपा एमालेले सरकारले संसदमा टेबल गरेको मिलेनियम च्यालेन्ज कम्प्याक्ट (एमसीसी) पक्षमा मत नहाल्ने भएका छन् । आज साँझ प्रधानमन्त्री निवास बालुवाटारमा एमाले अध्यक्ष ओली र प्रधानमन्त्री शेरबहादुर देउवाबीच भएको भेटमा एमालेले एमसीसीको पक्षमा मत नहाल्ने जानकारी दिएको हो ।

भेटवार्तामा भएको कुराकानी जानकारी दिँदै एमाले नेता बिष्णु रिजालले सामाजिक सञ्जाल फेसबुकमा लेख्दै भनेका छन्, ‘आज साँझ प्रधानमन्त्री शेरबहादुर देउवा र हाम्रो पार्टीका अध्यक्ष केपी शर्मा ओलीबीच प्रधानमन्त्री निवास वालुवटारमा भेटवार्ता भएको छ । भेटका क्रममा प्रधानमन्त्रीज्यूले हाम्रो पार्टीसमक्ष सत्तारुढ गठबन्धनभित्रबाटै आफ्नो सरकारलाई असहयोग भएकाले प्रतिनिधिसभामा प्रस्तुत मिलेनियम च्यालेन्ज कम्प्याक्ट (एमसीसी) अनुमोदनमा सहयोगका लागि आग्रह गर्नुभयो ।’

उनले थप लेखेका छन्, ‘हाम्रा पार्टी अध्यक्ष कमरेडले आफ्नो पार्टीले विगत छ महिनादेखि जायज मागहरु राखी सदनमा आवाज उठाइरहेको स्मरण गराउँदै ती मागहरु पूरा नभएसम्म अन्य कुनै पनि संसदीय प्रक्रियामा प्रवेश गर्न नसक्ने कुरा पुनः स्पष्ट पार्नुभएको छ । भेटवार्ताा अध्यक्ष कमरेडसँगै बरिष्ठ उपाध्यक्ष कमरेड ईश्वर पोखरेल, उपाध्यक्ष कमरेड विष्णुप्रसाद पौडेल र उपमहासचिव कमरेड विष्णु रिमाल सहभागी हुनुहुन्थ्यो ।’