काठमाडौं,१९पौष।राष्ट्रपति कार्यालयले आज (आइतबार) संसद् विघटनसम्बन्धमा सर्वोच्च अदालतले मागेको लिखित जवाफ पेस गर्दै छ । संसद् विघटनविरुद्ध परेका रिटमा सर्वोच्च अदालतको संवैधानिक इजलासले कारण देखाऊ आदेश जारी गर्दै प्रधानमन्त्री र राष्ट्रपति कार्यालयलाई लिखित जवाफ पेस गर्न आजसम्मको समयसिमा दिएको थियो ।

राष्ट्रपति कार्यालय स्रोतका अनुसार संवैधानिक कानुनी परामर्श सबै सकिएको र आज जवाफ पेस लागिएको हो ।

प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले यही पुस ५ गते प्रतिनिधिसभा विघटन गरी आगामी वैशाख १७ र २७ गते निर्वाचन मिति घोषणा गरेकी थिइन् ।

अहिलेकै अवस्थामा संसद् विघटन हुन नसक्ने जिकिर गर्दै सर्वोच्च अदालतमा एक दर्जन बढी रिट दायर भएका थिए ।

पुस १० गते संवैधानिक इजलासले सरकारसँग संसद् विघटन गर्नुको लिखित जवाफ माग गर्दै अर्को पेसी पुस २२ गतेका लागि तोकेको छ । २२ गतेदेखि निरन्तर सुनवाई हुने जनाइएको छ ।