धनगढी,०६ मंसिर। च्याउ खेतीबाट मनग्य आम्दानी हुन थालेपछि कैलालीमा युवा पुस्ताको आकर्षण बढेको छ ।

कम लगानी, कम समय र थोरै जमिनमा राम्रो आम्दानी हुन थालेपछि च्याउ खेतीतर्फ युवा पुस्ताको आकर्षण बढेको हो । पछिल्लो समय उच्च शिक्षा हासिल गरेका युवापुस्ताले च्याउ खेतीलाई व्यावसायिक रुपमा अगाडी बढाएका छन् । 

गोदावरी नगरपालिका वडा नम्बर ३ मालाखेती चौकीडाँडाका डिल्लीराज जोशी काठमाडौँमा अध्ययन गर्ने क्रममा च्याउ फार्ममा काम गरेका थिए । स्नातकोत्तरसम्मको अध्ययन गरेका जोशीले काम गर्ने क्रममै सिकेको सीपलाई सदुपयोग गरी व्यवसायमा परिणत गरेका छन् । उनी पछिल्लो ८ वर्षदेखि च्याउँ खेती गर्दै आएका हुन् ।

त्रिपुरा मसरुम एग्रो हर्बस फार्म नै सञ्चालन गरेको बताउँदै उनले भने, ‘३ महिना काठमाण्डौँमा मास्टर्स गर्दा खेरी एउटा च्याउ फर्ममा काम गरेर र त्यहाँबाट अनुभव लिए । छोटो समयमै उत्पादन हुने, आम्दानी पनि राम्रो र अरुलाई पनि रोजगारी दिन मिल्ने हुनाले यो पेसामा लागेको हुँ ।’ 

१० हजार रुपैयाँको लगानीबाट च्याउ खेती सुरु गरेका जोशीको निरन्तरको परिश्रम र लगावले एउटा सफल व्यवसायी बन्न सफल भएका छन् । अहिले उनले १४ वटा टनेलमा च्याउ खेती गर्दै आएका छन् ।

अरुलाई रोजगारी
जोशीले च्याउ खेतीलाई व्यावसायिकता दिएर आफू मात्र नभई अन्यलाई समेत रोजगारी दिन सफल भएका छन् । अहिले जोशीको फार्ममा २ जना पूर्ण र १७ जनाले आशिंक रोजगारी पाएका छन् । जोशीले च्याउ खेतीबाट वार्षिक ८ लाख रुपैयाँसम्मको आम्दानी गर्दै आएको बताएका छन् ।

जोशी जस्तै धनगढी उपमहानगरपालिका वडा नम्बर ७ मनेहराका लोकेन्द्र जोशी पनि व्यावसायिक च्याउ खेतीमा जमेका छन् । २०७१ सालमा च्याउ खेती सुरु गरेका उनले अहिले व्यावसायिक रुप दिएका छन् । 

भारतमा सुरक्षा गार्डको रुपमा पनि काम गरिसकेको अनुभव भएका जोशी आफ्नै ठाउँमा केही न केही गर्नुपर्छ भन्ने सोचका साथ च्याउ खेतीमा लागेको बताए ।

अहिले २ कठ्ठा जग्गामा च्याउ खेती गरिरहेका जोशीले हिउँदे याममा ३ लाख रुपैयाँसम्मको आम्दानी गर्दै आएका छन् । 

उनले धनगढीको मनेहरा सामुदायिक वनबाट र २ दिन र सेवक नेपालबाट १ हप्ताको तालिमपछि च्याउ खेतीमा कम्मर कसेर लागेका हुुन् ।

२२ हजार रुपैयाँको हाराहारीमा च्याउ खेती सुरुवात गरेका उनले अहिले २ लाख रुपैयाँ लगानी गरेका छन् ।

उनले भने, ‘अब यसै पेसालाई अघि बढाएर च्याउ बन्ने विभिन्न परिकार पाउने रेष्टुरेन्ट खोल्ने योजनामा छु ।’