धनगढी,०९ असोज।  प्रिमिर लिग क्लब म्यानचेस्टर सिटीले काराबाओ कप फुटबलमा संघर्षपूर्ण जित निकालेको छ । बिहीबार राति भएको खेलमा बर्नमाउथमाथि २–१ गोलको संघर्षपूर्ण जित निकालेको हो । 

सिटीका लागि लिअम डेलेप र फिल फोडेनले एक एक गोल गरे । बर्नमाउथका लागि साम सुरेड्जले एक गोल फर्काए । 

खेलको १८ औं मिनेटमा डेलेपले गोल गर्दै सिटीलाई अग्रता दिलाएका थिए । उनले फिल फोडेनको पासमा गोल गर्दै सिटीलाई १–० को अग्रता दिलाए । तर, त्यसको चार मिनेट नबित्दै बर्नमाउथका स्ट्राइकर सामले गोल गदै खेल पहिलो हाफमा १–१ को बराबरीमा ल्याए । 

दोस्रो हाफमा भने दुबै टोलीले गोलका लागि निकै नै संघर्ष गरे । तर, दोस्रो हाफमा बर्नमाउथले गोल गर्न भने सकेन् । खेलको ७५ औं मिनेटमा सिटीले गोल गर्दै पुनः खेलमा अग्रता लियो । सिटीका लागि फोडेनले गोल गर्दै २–१ को संघर्षपूर्ण जित दिलाएका हुन् । 

जितसँगै सिटी काराबाओ कपको अर्को चरणमा प्रवेश गरेको छ । बर्नमाउथ भने पराजित हुँदै प्रतियोगिताबाट बाहिरिएको छ ।