धनगढी,२९भदौ।दिनेश सञ्चार गृह र पत्रकारमाथि आक्रमण गर्नेलाई कारबाहीको माग गर्दै नेपाल पत्रकार महासंघ जिल्ला शाखा कैलालीले आन्दोलन जारी राखेको छ। पीडित पक्षले कुटपिट गर्नेलाई कारबाहीको माग गर्दै किटानी जाहेरी दिए पनि प्रहरीले संलग्नलाई पक्राउ नगरेको भन्दै आज जिल्ला प्रशासन कार्यालय अगाडि धर्ना दिइएको हो।

आईतवार धनगढीमा भएको पत्रकारहरुको भेलाले नेपाल पत्रकार महासङ्घ कैलालीको अगुवाईमा चरणबद्ध आन्दोलन गर्ने घोषणा गरेको थियो। सोही अनुसार आज प्रशासनमा एक घण्टा धर्ना दिइएको नेपाल पत्रकार महासंघ जिल्ला शाखा कैलालीका अध्यक्ष जगत साउँदले बताए।

‘आक्रमण भएको चार दिन पुगिसकेका छ,’ अध्यक्ष साउँदले भने, ‘प्रहरीले आक्रमणकारीलाई पक्राउ गर्न चाँसो नै दिएको देखिएन्। प्रहरी प्रशासनको भूमिकामाथि आशंका गर्ने ठाउँ देखियो।’ धर्नापछि संम्बोधन गर्दै नेपाल पत्रकार महासंघ सुदूरपश्चिम समितिका महासचिव योगेश रावलले पत्रकारलाई न्याय दिन प्रहरी प्रशासन उदासिन बनेको बताउँदै आम नागरिको अवस्था कस्तो होला भनेर प्रश्न गरे।

‘मिडियामाथि समाचार कक्षभित्रै पत्रकार कुटिएका छन्,’ उनले भने, ‘पीडित पक्षले किटानी जोहरी दिएर पनि दोषीलाई पक्राउ नगर्नु बिडम्बना हो।’ नेपाल पत्रकार महासंघका पूव केन्द्रिय सदस्य कर्ण शाहले कोरोना महामारीमा पनि बाध्य भएर आन्दोलित हुनु परेको बताए।

‘पत्रकारमाथि भईरहेको श्रृंखलाबद्ध आक्रमणले दण्डहिनता मौलाएको छ।’ उनले अगाडि थपे। पत्रकार घनवहादु्र शाहले प्रहरी प्रशासनमाथिको विश्वास कायम राख्नका लागि आक्रमणमा संलग्नलाई तत्काल पक्राउ गर्नुपर्ने बताए। ब्रोडकाष्टिङ एसोसिएसन अफ नेपाल वानका उप–महासचिव गोविन्द रोश्याराले प्रहरीको भूमिकामाथि औला उठाउने ठाउँ देखिएको बताए।

उनले कोरोना महामारीको बेलामा सडकमा आउन बाध्य भएको बताउँदै प्रहरीले आक्रमणकारीलाई तत्काल पक्राउ गर्नुपर्ने बताए। दलित पत्रकार संघकी प्रदेश अध्यक्ष रमा भट्टराईले सञ्चार गृहमाथिको हमला दुखद भएको बताउँदै पत्रकारमाथिको आक्रमण सह्य नभएको बताइन्। यस्तै नेपाल पत्रकार महासंघ कैलाली शाखाले आज मुख्यमन्त्री त्रिलोचन भट्टलाई ध्यानाकर्षण पत्र बुझएको छ।

कैलाली शाखाका अध्यक्ष साउँदले ध्यानाकर्षण पत्र बुझाउँदै आक्रमण भएको चार दिन हुँदासम्म पनि संलग्न पक्राउ नपरेको र दोषीमाथि तत्काल कारवाही हुनुपर्ने माग गरे। ध्यानाकर्षण पत्र बुझ्दै मुख्यमन्त्री भट्टले दिनेश सञ्चार गृहमा आक्रमण गर्दै पत्रकारमाथि कुटपिट गर्नेहरुलाई कारवाही हुने बताए।

‘सञ्चार गृहमाथि आक्रमण भएको जानकारी पाउँने वित्तिकै मैले प्रहरी, प्रशासनसंग कुराकानी गरेको थिए,’ मुख्यमन्त्री भट्टले भने, ‘आज पनि कैलालीका प्रमुख जिल्ला अधिकारीसंग घटनाबारे जानकारी लिएको छु। घटनामा संलग्नलाई कारवाही गर्न भनेको छु।’ यस्तै महासंघले आन्दोलन अन्तर्गत भोली आन्तरिक मामिला तथा कानुन मन्त्रालयमा धर्ना दिने कार्यक्रम तय गरिएको जानकारी दिएको छ।

शुक्रबार दिनेश सञ्चार गृहको कार्यालयमा पुगेका १५र२० जनाको समूहले गृहका सह–सम्पादक जनक विष्टलाई कुटपिट गरेका थिए भने व्यवस्थापक अमिता कुँवर र प्राविधिक कल्पना सिंहमाथि पनि हातपात भएको थियो।

जिल्ला प्रहरी कार्यालयका प्रवक्ता प्रहरी नायव उपरिक्षक प्रतिक विष्टले दिएको जानकारीका आधारमा धनगढीमा थुनुवा कक्षमै १९ बर्षीय युवकले गरे आत्महत्या शिर्षकको समाचार दिनेश खवरमा प्रकाशन भएको थियो।

तर दिनेश खवरमा पुगेका युवाहरुले भने आत्महत्या नभई हत्या भएको भन्दै सञ्चारमाध्यममा आक्रमण गरेका थिए। तर प्रहरीले भने अहिले पनि १९ वर्षीय युवक रोशन विकले आत्महत्या गरेको बताउँदै आएको छ।