काठमाडाैं २९ भदौ  ।कोरोना  भाइरस संक्रमित स्वास्थ्यकर्मीहरूले नै अन्य संक्रमितलाई स्वास्थ्य उपचार गरिरहेको सुन्दा अचम्म लाग्न सक्छ । संक्रमितले संक्रमितलाई नै कसरी उपचार गर्न सक्छन् भन्ने प्रश्न पनि उठ्छ । तर नेपाली सेनामा त्यसै भइरहेको छ ।

सेनाका संक्रमित स्वास्थ्यकर्मीहरूले आइसोलेसनमा बस्दासमेत अन्य संक्रमितलाई सेवा दिइरहेका छन् । उनीहरूले कोभिड–१९ पोजिटिभ भएर आइसोलेसनमा गए पनि त्यहाँ आएका अन्य संक्रमितलाई सेवा दिइरहेका हुन् । सेनामा आइतबारसम्म ५६ जना स्वास्थ्यकर्मी कोरोना भाइरसबाट संक्रमित भइसकेका छन् । सैनिक प्रवक्ता तथा सहायक रथी सन्तोषबल्लभ पौडेलका अनुसार डाक्टर र नर्समा संक्रमण देखिएको छ । उनले स्वास्थ्यकर्मीमा सेनाका स्थायीका साथै सम्झौता गरेकाहरू पनि रहेको बताए ।

वीरेन्द्र सैनिक अस्पतालमा ८० जना क्षमताको आइसोलेसन कक्ष छ । त्यहाँ अहिले करिब ६५ जना संक्रमित छन् ।

त्यहाँ स्वास्थ्यकर्मी पनि छन् र आइसोलेसनमै बसेर उपचार गरिरहेका छन् ।

यस्तै, सूर्य विनायकस्थित नेपाली सेनाको ब्यारेकमा रहेको आइसोलेसनमा पनि सोही मोडलमा काम भइरहेको छ । त्यहाँ ७५ जनाका लागि आइसोलेसन कक्ष छ । आइसोलेसनमा संक्रमित स्वास्थ्यकर्मी पनि छन् । वीरेन्द्र सैनिक आवासीय महाविद्यालय सल्लाघारीमा रहेको आइसोलेसन कक्षमा पनि सेनाका स्वास्थ्यकर्मीहरू छन् ।

प्रवक्ता पौडेलले यसलाई राम्रो वा नराम्रो जसरी व्याख्या गरे पनि सेनामा संक्रमित भएर आइसोलेसनमा बसेका स्वास्थ्यकर्मीले अन्य संक्रमितलाई उपचार गरिरहेको बताए । ‘हाम्रा आइसोलेसनमा बसेका चिकित्सकले अन्य संक्रमितलाई उपचार गर्न सहयोग गरिरहेका छन् । आइसोलेसनमा भएकाहरूको रक्तचाप, ज्वरोलगायत हेर्न सकिने र मिल्ने कुराहरूमा चिकित्सकहरू आफू आइसोलेसनमा भए पनि काम गरिरहेका छन्,’ उनले भने, ‘स्वास्थ्यकर्मीहरूले कुराकानी गर्ने, स्वास्थ्यका अन्य कुराको जानकारी दिने गर्छन् । के खाने, के नखाने भन्नेबारेमा पनि जानकारी दिन्छन् ।’

प्रवक्ता पौडेलका अनुसार आइसोलेसनमा रहेका सैनिक स्वास्थ्यकर्मीहरूले अन्य संक्रमितलाई भित्रैबाट उपचार गरेर रिपोर्ट बाहिर अन्य चिकित्सकलाई दिँदा काममा सहज भएको छ । ‘जसले गर्दा आइसोलेसनमा भएकालाई छुट्टै पीपीई सुई लगाएर जानु नपर्ने हुन्छ,’ उनले भने । उनले सेनामा ७ दिनको अन्तरालमा ५६ जना स्वास्थ्यकर्मीहरूलाई कोरोना भाइरसको संक्रमण भएको र अब एक साताभित्र सबै आइसोलेसनको अवधि पूरा गरेर बाहिर निस्कने अनुमान गरिएको बताए ।

सेनामा पछिल्लो समय कोरोना संक्रमण ह्वात्तै बढेको छ । जेठ ३ गतेदेखि आइतबारसम्म सेनामा एक हजार ३ सय ८३ जना संक्रमित छन् । २ सय ९४ जना निको भएका छन् । एक हजार ८९ चाहिँ उपचारत छन् ।
लिबिया उड्न लागेको टोली रोकियो ।

नेपाली सेनाका केही जवानमा कोरोना भाइरस भेटिएपछि संयुक्त राष्ट्रसंघ (यूएन) को लिबियास्थित शान्ति मिसनका लागि जान लागेको टोलीको यात्रा स्थगित भएको छ ।

सेनाका अनुसार उक्त टोली रोटेसनका लागि त्यसतर्फ जान लागेको थियो । काभ्रेपलाञ्चोकको पाँचखालस्थित वीरेन्द्र शान्ति कार्य तालिम केन्द्रमा तालिम समाप्त गरी क्वारेन्टाइनमा रहेका फौजमध्ये उडानपूर्व गरिएको परीक्षणमा केहीमा संक्रमण पुष्टि भएको सेनाले जनाएको छ । सेनाले अब पोजिटिभ देखिएका व्यक्तिहरूको कन्ट्याक ट्रेसिङ गरी सबै जनाको फेरि स्वास्थ्य परीक्षणपछि मात्रै रोटेसन फ्लाइटको मिति तय गर्ने जनाएको छ । कान्तिपुर दैनिकमा जगदीश्वर पाण्डेले खबर लेखेका छन् ।