काठमाडौं,२२भदौ। विश्वमा कोरोनाबाट सङ्क्रमित हुनेको सङ्ख्या अमेरिकापछि अब भारतमा धेरै भएको तथ्याङ्कले देखाएको छ । यसअघि सङ्क्रमित हुनेको सङ्ख्या भारतमा भन्दा ब्राजिलमा बढी थियो ।

अहिले भारतमा सङ्क्रमित हुनेको सङ्ख्या ४२ लाख पुगेको छ भने त्यहाँ सङ्क्रमणकै कारण मृत्यु हुनेको सङ्ख्या ७२ हजार नाघेको छ ।

बीबीसीका अनुसार देशको जनसङ्ख्याको हिसाबले कोभिडका कारण मानिसको मृत्यु हुने सङ्ख्या तुलनात्मक रूपमा भारतमा कम मानिन्छ । तर, तीव्र गतिमा भाइरसको सङ्क्रमण ग्रामीण भेगसम्म फैलिँदै गएपछि चिन्ता बढेको छ ।

राजधानी दिल्लीमा पनि सङ्क्रमितको सङ्ख्यामा उल्लेख्य वृद्धि भइरहेको बीबीसीले जनाएको छ । तर, सङ्क्रमण सहरबाट विस्तारै साना नगर अनि ग्रामीण क्षेत्रहरूमा सर्दैछ ।

बीबीसीका अनुसार सरकारले व्यापार र यातायात पुनः खोल्दै गर्दा सङ्क्रमितको सङ्ख्या पनि ह्वात्तै बढेको हो । लकडाउन खुलेपछि मानिसहरूको गतिविधि विभिन्न क्षेत्रमा बढ्नुले पनि सङ्क्रमितको सङ्ख्यामा वृद्धि भएको विज्ञहरूले बताएका छन् ।

यसअघि आइतवार भारतमा एकैदिन थप ९० हजार मानिस कोरोना सङ्क्रमित भएको तथ्याङ्क सार्वजनिक भएको थियो । त्यहाँ आइतवार मात्रै नभइ लगातार विगत तीन दिनदेखि सङ्क्रमितको सङ्ख्या ८० हजार नाघ्दै आएको थियो ।

अमेरिकाको जोन्स हप्किन्स विश्वविद्यालयको तथ्याङ्क अनुसार अहिलेसम्म अमेरिकामा सबैभन्दा बढी ६२ लाखभन्दा बढी मानिसमा सङ्क्रमण देखिसकेको छ ।

त्यसपछि भारतमा ४२ लाख र तेस्रोमा ब्राजिल परेको छ जहाँ ४१ लाखभन्दा बढीमा कोरोनाको सङ्क्रमण देखिएको छ ।